Batys Qazaqstanda 3 iri qara maldan qutyrý aýrýy tabyldy
ORAL. KAZINFORM — Batys Qazaqstan oblysynda bıyl janýarlardyń asa qaýipti 12 juqpaly aýrýyna qarsy 11 mln bas maldy egý kózdelip otyr.
BQO veterınarııa basqarmasynyń basshysy Abzal Bralıevtiń óńirlik kommýnıkatsııalar qyzmeti alańynda ótken brıfıngte málim etkenindeı, oǵan qosa 2,2 mln bas malǵa dıagnostıkalyq zertteý júrgiziledi.
Abzal Serikulynyń sózine qaraǵanda, kúni búgin oblysqa 7,8 mln doza qajetti veterınarlyq preparattar jetkizildi. Sibir jarasy men aýsylǵa qarsy mal túgeldeı egiledi. Al qalǵan aýrýlarǵa qarsy shyqqan jaǵdaıdaǵy paıyzdyq kórsetkishine qaraı vaktsınatsııadan ótkiziledi.
Bıylǵy alty aıda oblysta 4 mln 754 myń bas mal, ıaǵnı 100 paıyz egildi.
- Brýtsellez aýrýy erekshe nazarda. Dıagnostıkalyq zertteýler nátıjesinde 444,4 myń iri qaranyń 3 215-inen nemese 0,7 paıyzynan brýtsellez tabyldy. Zerttelgen 686,7 myń bas usaq maldyń 649-y nemese 0,1 paıyzy zaqymdanǵan bolyp shyqty. Brýtsellezge shaldyqqan janýarlar kelisim-shartqa sáıkes 8 mal soıý ornyna tapsyrylyp, joıylady. 2020 jylmen salystyrǵanda, keıingi kezde brýtsellezdiń tómendep kele jatqany baıqalady. Degenmen áli de atqarylar jumys kóp, - dedi basqarma basshysy.
Onyń aıtýynsha, bıylǵy birinshi jartyjyldyqta óńirde úsh iri qara mal qutyrý aýrýymen tirkeldi.
- Munyń ekeýi Bókeı ordasy aýdany Bısen aýyldyq okrýginde, bireýi Kaztalov aýdany Kaztalov aýyldyq okrýgindegi Saıqudyq qystaǵynan shyqty. Aýrý oshaqtarynda tıisti keshendi veterınarııalyq is-sharalar tolyqtaı júrgizildi. Qazirgi ýaqytta epızootııalyq ahýal turaqty, - dedi A.Bralıev.
Eske sala keteıik, budan buryn Batys Qazaqstanda kómilgen sibir jarasy oshaǵynan qaýip bar ma, sony jazǵan edik.