Batys Qazaqstanda 28 mektep kúrdeli jóndeýden ótedi

ORAL. KAZINFORM – Batys Qazaqstan oblysynda 2025 jyly 28 mektepti kúrdeli jóndeýden ótkizý josparlanyp otyr. 

Oblys ákimi Narıman Tóreǵalıevtiń Kazinform tilshisine málim etkenindeı, buǵan tıisti qarajat qarastyrylady.

Óńir basshysynyń sózine qaraǵanda, jańa jylda 15 mektep qurylysy júrgiziledi. Sonyń ishinde «Jaıly mektep» jobasy aıasynda 9 mekteptiń altaýynda qurylys jalǵasady. Aıtalyq, Oral qalasynda «Juldyz» shaǵynaýdanynda 1500 oryndyq jańa mektep salynady.

Oblys ortalyǵynda № 8 mektep qurylysyn 2025 jylǵy 1 qyrkúıekke deıin aıaqtaý kózdelip otyr. 

- Keıingi eki jylda Batys Qazaqstan oblysynda 22 mektep iske qosylsa, osy baǵyttaǵy jumystardy jalǵastyramyz. Memleket basshysy halyqtyń turǵylyqty jerine mektep, balabaqsha, densaýlyq saqtaý nysandarynyń jaqyn bolýy kerektigi týraly tapsyrma bergen bolatyn. Osy oraıda qalada bolsyn, aýdan ortalyqtarynda bolsyn, qaı jerde bala mektepke syımaı jatyr, soǵan erekshe kóńil bólmekshimiz. Sondyqtan jańa mektepter salý, burynǵylaryn kúrdeli jóndeýden ótkizý bizdiń basty baǵytymyz bolyp qala bermek, - dedi Narıman Tóreǵalıev. 

Eske sala keteıik, budan buryn BQO-da 1 500 oryndyq jaıly mekteptiń qoldanysqa berilgenin jazǵan bolatynbyz.