Batys Qazaqstanda 26 adam brýtsellez juqtyrǵan

ORAL. KAZINFORM — Batys Qazaqstan oblysynda bıylǵy 10 aıda 26 adamnyń brýtsellezben aýyrǵany tirkeldi. 

BQO sanıtarııalyq-epıdemıologııalyq baqylaý departamentiniń basshysy Dınara Jańabergenovanyń málim etkenindeı, bul kórsetkish 100 myń adamǵa shaqqanda, 3,7-den keledi.

Onyń sózine qaraǵanda, ótken jyldyń osy kezeńimen (31) salystyrǵanda, brýtsellez 5 derekke azaıǵan.

— Epıdemıologııalyq tekserý nátıjesinde 17 adamnyń jeke mal sharýashylyǵyndaǵy jumys kezinde — maldy kútý, tóldetý jáne soıý barysynda indet juqtyrǵany anyqtaldy. Brýtsellez — janýarlardan, kóbine sıyr, qoı-eshki, túıe, shoshqa sııaqty maldan juǵatyn qaýipti juqpaly aýrý, — deıdi Dınara Jańabergenova.

Onyń aıtýynsha, brýtsellezdiń negizgi belgileri: dene qyzýynyń kóterilýi, býyn men bulshyq ettiń aýyrýy, álsizdik, tersheńdik.

— Osy oraıda aldyn alý sharalaryn eske salamyz. Eń aldymen mal ónimderin (sút, et) jaqsylap pisirip, qaınatyp paıdalaný kerek. Shıki sút pen odan jasalǵan taǵamdardy ishpeý qajet. Mal týǵan kezde, sút saýǵanda nemese et óńdegende qolǵap kııýdi umytpaǵan durys. Aýrý maldy bólek ustaý mańyzdy, onyń ónimin paıdalanýǵa bolmaıdy. Qoldy jıi jáne sabyndap jýǵan abzal. Belgiler baıqalsa, óz betinshe emdelmeı, dárigerge júgingen jón, — dedi departament basshysy.

Eske sala keteıik, budan buryn Batys Qazaqstanda 16 myńǵa jýyq adamnyń JRVI-men syrqattanǵanyn jazǵan edik.