Batys Qazaqstanda 21 eldi meken spırttik ishimdikten bas tartty
ORAL. KAZINFORM – Batys Qazaqstan oblysynda spırttik ishimdikterdi tutyný men satýdan bas tartqan 21 eldi mekenniń 15-inde bıyl birde-bir qylmys tirkelmegen.
BQO polıtsııa departamentiniń baspasóz qyzmetinen málim etkenindeı, aýyldarda spırttik ishimdikti ishý men satýdan óz erkimen bas tartý salamatty ómir saltyn ornatý men qoǵamdyq tártipti saqtaýǵa septesedi.
Atap aıtqanda, Aqjaıyq aýdanynda Jambyl (Jambyl aýyldyq okrýgi), Qaraǵaı (Alǵabas), Jánibekte Tegisshil (Borsy), Jumaev (Taý), Kaztalovta Saraljyn (Birik), Saryqudyq (Taldyapan), Syrymda Jetikól, Qosaral (Qosaral), Abaı (Saroı) aýyldary alkogolden bas tartty.
Sondaı-aq osy tizimge Tasqala aýdanynan Jiger (Tasqala aýyldyq okrýgi), Aqkútir, Qaraoı, Qyzylbas (Aqtaý), Almaly, Qalmaqshabyn, Qısyqsaı (Qazaqstan), Taldybulaq, Emenjar (Shejin), Qalmaq (Mereke), Terektiden Bozaı (Aqsoǵym, Shyńǵyrlaýdan Aqsýat (Qaraǵash) eldi mekenderi endi.
Bastama kótergenderdiń biri – Aqsoǵym aýyldyq okrýgine qarasty Bozaı eldi mekeninde qazirgi tańda dúkende araq-sharap satylmaıdy.
Terekti aýdany Aqjaıyq polıtsııa bóliminiń bastyǵy, polıtsııa maıory Dıdar Ahmetovtiń aıtýynsha, atalmysh bólim qamtıtyn aýmaqta 5 aýyldyq okrýgte 24 eldi mekende 10 myńǵa jýyq halyq turady.
– Ótken jylmen salystyrǵanda, mal urlyǵy da azaıdy. Aqsaqaldar keńesi múshelerimen aqyldasa otyryp, polıtsııa qyzmetkerleri profılaktıkalyq is-sharalarǵa basa mán berip otyr. Muny jastar da qoldaǵan. Bozaı aýylynda turǵyndar spırttik ishimdi tutynýdan tolyqtaı bas tartty. Munda 10 jyldan astam ýaqyt boıy qyzmet atqaratyn Aqsoǵym aýyldyq okrýginiń ýchaskelik ınspektory, polıtsııa maıory Qaısar Esentaevtyń eńbegi mol, - deıdi D. Ahmetov.
Ýchaskelik polıtsııa ınspektory Q. Esentaev óńirde basqa da aýyldyq okrýgter turǵyndary osy bastamany keńinen qoldasa eken degen tilegin jetkizdi.
– Árıne, araq-sharap satylmaıtyn dúkenderdiń kóbeıgeni abzal. Buǵan biz de múddelimiz. Eger turǵyndar spırttik ishimdikten boıyn aýlaq ustasa, quqyq buzýshylyqtyń azaıatyny anyq, - dedi Tasqala aýdany Shejin aýyldyq okrýginiń ákimi Mırjan Esqalıev.
BQO polıtsııa departamentiniń derekteri boıynsha oblysta jyl basynan beri masań kúıde jasalatyn quqyq buzýshylyqtyń aldyn alý maqsatynda 43 azamat emdeý mekemelerine májbúrli túrde jiberildi.
QR Ákimshilik quqyq buzýshylyq týraly kodeksiniń 440-baby boıynsha (qoǵamdyq oryndarda ishimdik ishý nemese mas kúıde bolý) 2 049 hattama toltyryldy. Sondaı-aq alkogol ónimin tyıym salynǵan ýaqytta nemese 21 jasqa tolmaǵandarǵa satqan 66 dúken ıesi ákimshilik jaýapqa tartyldy.
Eske sala keteıik, budan buryn Oralda 33 jastaǵy turǵynnyń adamdardy qorqytyp, aqsha bopsalaýmen aınalysqanyn jazǵan bolatynbyz.