Batys Qazaqstanda 106 myńnan astam oqýshy jazǵy demalyspen qamtylmaq
ORAL. KAZINFORM – Batys Qazaqstan oblysynda 106 935 oqýshy nemese 1-10 synyp shákirtteriniń 94,7 paıyzyn jazǵy demalyspen qamtý josparlanýda.
BQO bilim basqarmasynyń basshysy Aıgúl Myńbaevanyń málim etkenindeı, barlyq múddeli uıymdardy shaqyra otyryp, jazǵy demalysty uıymdastyrý, balalardy saýyqtyrý jáne jumyspen qamtý máseleleri boıynsha bilim bólimderiniń jaýapty mamandary men qala syrtyndaǵy lager basshylarynyń qatysýymen semınar-keńes ótkizildi.
Aıgúl Ádilgereıqyzynyń sózine qaraǵanda, sonymen qatar sanıtarııalyq-epıdemıologııalyq baqylaý basqarmalarymen birge lagerlerde zerdeleý jumystary júrgizildi. Jazǵy lagerlerdiń kúntizbelik josparlary men baǵdarlamalary ázirlendi.
«Óńirde túrli baǵyttaǵy 619 lager jumys jasamaqshy. Sonyń ishinde 18-i – qala syrtyndaǵy, 268-i – mektep janyndaǵy tamaqtanýy uıymdastyrylatyn lagerler. 327-si – mektep janyndaǵy tamaq uıymdastyrylmaıtyn lagerler men beıindik alańdar, altaýy – shatyrly lagerler. Oblys boıynsha áleýmettik qorǵalmaǵandardyń ishinen jetim jáne ata-ana qamqorlyǵynsyz qalǵan, az qamtylǵan otbasylar balalaryn túgeldeı, múmkindigi shekteýli jasóspirimderdiń 94 paıyzyn, devıantty minez-qulyqty (mektep esebinde turǵan, qolaısyz otbasyndaǵylar jáne polıtsııa bólimderinde esepte turǵandar) oqýshylardyń 98,2 paıyzyn jazǵy demalyspen qamtý josparlanýda», deıdi A.Myńbaeva.
Basqarma basshysynyń aıtýynsha, 109 494 oqýshy nemese 96,6 paıyzy jazǵy kezeńde jumyspen qamtylmaqshy. Sonyń ishinde 15 640-y nemese 14 paıyzy eńbekpen, 6 101-i (5,7 paıyzy) týrıstik qyzmetpen, 53 851-i (49,2 paıyzy) shyǵarmashylyqpen, 33 163-i (30,4 paıyzy) ıntellektýaldyq, 739-y (0,7 paıyzy) halyqaralyq is-sharalarmen qamtylady.
«Qazaqstan halqyna» qoǵamdyq qory daryndy aýyl balalarynyń ıntellektýaldyq, shyǵarmashylyq qabiletterin jetildirý jáne qoldaý kórsetý maqsatynda «QH Jazdyq joldama» qaıyrymdylyq jobasy boıynsha 5-8 synyptyń aýyl balalaryn saýyqtyrý úshin 829 oqýshyǵa kvota berdi, búgingi tańda daıyndyq jumystary júrgizilýde.
«Taǵy bir aıta ketetin jaıt, tótenshe jaǵdaıǵa baılanysty Qazaqstan Respýblıkasy Oqý-aǵartý mınıstrliginiń qoldaýymen kóktemgi sý tasqynynan zardap shekken otbasylardyń 183 balasy sáýir aıynda saýyqtyrý lagerlerinde demalsa, mamyrda 160 oqýshy "Baldáýren" respýblıkalyq oqý-saýyqtyrý ortalyǵyna jiberildi. Budan basqa, sý tasqynynan zardap shekken otbasylar balalary aýdandyq, qalalyq qala syrtyndaǵy jáne mektep janyndaǵy lagerlermen qamtamasyz etiledi jáne basqa óńirlerdegi (Býrabaı) lagerlerge jáne ekskýrsııalarǵa (Astana, Túrkistan) barady. 2023 jyly jazǵy demalyspen qamtylǵan balalar sany Báıterek, Shyńǵyrlaý aýdandarynda jáne Oral qalasynda oblystyq kórsetkishten tómen bolǵan edi. Bıyl Bókeı ordasy, Syrym aýdandary men Oral qalasy boıynsha qamtý tómen bolyp otyr. Eń bastysy, balalardyń jazǵy demalysyn qaýipsiz jáne tıimdi uıymdastyrýǵa basa kóńil bólinýde», dedi basqarma basshysy.
