Batys Qazaqstanda 1 300-den astam adam qyzylshamen aýyrǵan
ORAL. KAZINFORM – Batys Qazaqstan oblysynda ótken jyly 1 302 adamnyń qyzylshamen aýyrǵany tirkeldi.

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń Kazinform tilshisine málim etkenindeı, bul kórsetkish 2023 jylmen (477) salystyrǵanda, 2,7 esege ósken.
Onyń sózine qaraǵanda, qazirgi tańda epıdemıologııalyq jaǵdaı turaqtalyp keledi.
- Naýqastardyń 822-si nemese 63,1 paıyzy – 14 jasqa deıingi balalar. Al 164-i nemese 12,5 paıyzy – 1 jasqa deıingi sábıler. Qyzylsha oblystyń barlyq aýdanynda tirkeldi. Onyń basym bóligi Oral qalasynda, munda oblystyq kórsetkishten joǵary, - deıdi N.Mustaev.
Departament basshysy orynbasarynyń aıtýynsha, qyzylshanyń ósýi men taralýynyń negizgi sebebi – medıtsınalyq qarsy kórsetilimder men profılaktıkalyq egýden bas tartýdyń saldarynan turǵyndardyń ımmýndyq qabiletiniń tómendeýi.
Qyzylshaǵa kúdikti jaǵdaılardyń bári zerthanalyq tekserilip, barlyǵy sol jolmen rastaldy.
Mamannyń málimdeýinshe, qyzylsha – aýa joly arqyly óte jyldam taralatyn vırýsty juqpaly aýrýlardyń biri. Vırýs syrtqy ortaǵa aýyrǵan adam sóılegende, jótelgende, túshkirgende, túkirikpen bólinedi. Inkýbatsııalyq kezeńi juqtyrǵannan keıin birinshi belgileri paıda bolǵanǵa deıin, ıaǵnı 7 kúnnen 14 kúnge deıin sozylady. Dert sýyq tııý belgilerimen bastalady. Dene qyzýy 38-40 gradýsqa kóterilip, álsizdik paıda bolady. Adamnyń tábeti bolmaı, jótelip, murny biteledi.
- Qyzylshanyń aldyn alýdyń eń tıimdi, senimdi jáne balamasyz joly vaktsınatsııa ekenin eske salamyz. Qyzylshaǵa qarsy egý – vırýsty jasandy jolmen toqtatý, nátıjesinde aǵza ózin qorǵaıtyn ımmýnıtet qalyptastyrady. Eń alǵashqy vaktsınatsııa balalarǵa 12-15 aılyǵynda, ekinshisi 6 jasta jasalady. Egý turaqty ımmýndyq qorǵanyshty qalyptastyrady. Naýqaspen qarym-qatynasta bolǵan 30 jasqa deıingiler qosymsha egiledi, - dedi N.Mustaev.
Eske sala keteıik, budan buryn Batys Qazaqstanda 300-den astam adamnyń týberkýlezge shaldyqqanyn jazǵan bolatynbyz.