Batys Qazaqstan oblysyndaǵy sý qoımalarynyń jaǵdaıy qalaı
ORAL. KAZINFORM – Jaıyq, Shaǵan, Qaraózen jáne Saryózen transshekaralyq ózenderi Batys Qazaqstan oblysynyń basty sý arterııasy bolyp esepteledi.
«Qazsýshar» RMK Batys Qazaqstan fılıaly dırektorynyń mindetin atqarýshy Raýan Husaıynovtyń óńirlik kommýnıkatsııalar qyzmeti alańynda ótken brıfıngte málim etkenindeı, atalǵan ózender aǵysynyń 80 paıyzy Reseı Federatsııasy aýmaǵynda qalyptasady. Sondyqtan ózenderdiń joǵarǵy aǵysyndaǵy gıdrologııalyq rejımge tikeleı táýeldi.
Raýan Erlanulynyń sózine qaraǵanda, «Qazsýshar» RMK Batys Qazaqstan fılıaly Reseı Federatsııasynyń sý sharýashylyǵy qyzmetterimen, atap aıtqanda, Orynbor, Saratov oblystarynyń, Bashqortostan Respýblıkasynyń tıisti mekemelerimen tikeleı jáne turaqty baılanys ornatty. Kóktemgi tasqyn kezinde sý sharýashylyǵynyń kúndelikti jaǵdaıy týraly aqparat almasylyp otyrady. Bul sý sharýashylyǵy nysandaryn sáıkesinshe rettep, tasqyn sýyn apatsyz ótkizýge múmkindik beredi.
– Orynbor oblysyndaǵy Irekli qoımasynan Jaıyq ózenine 15 aqpannan bastap sekýndyna 139 tekshe metr sý jiberilip jatqany belgili. Kúni búgin sý qoımasy jobalyq kólemge 76 paıyzǵa tolǵan. Bos syıymdylyǵy – 767 mln tekshe metr. Aǵymdaǵy gıdrologııalyq rejımge sáıkes atalǵan sý jiberý kólemi 15 naýryzǵa deıin saqtalady. Osyǵan oraı sý qoımasynyń syıymdylyǵyn 950,0 mln tekshe metrge jetkizý kózdelýde, bul jobalyq kólemniń 70 paıyzyn quramaq, - dedi R.Husaıynov.
Onyń aıtýynsha, oblystaǵy 5 aýdannyń 87 eldi mekenin sýmen qamtamasyz etip otyrǵan Jaıyq-Kóshim sýarý-sýlandyrý júıesi Jaıyqtan sýarylady. Júıeniń kaskadty sý qoımalarynda jalpy kólemi 260,3 mln tekshe metr strategııalyq sý qory jınaqtalady. Búginde sý qoımalary ortasha eseppen jobalyq kólemnen alǵanda, 58 paıyzǵa tolǵan.
Shaǵan ózenindegi Shaǵan sý qoımasy 2025 jyldyń vegetatsııalyq kezeńi aıaqtalǵannan keıin ýákiletti organdardyń kelisimimen qazan aıynyń 25-inen paıdalanylmaıtyn kólemge deıin bosatyldy. Sóıtip kóktemgi tasqyn sýdy ótkizýge daıyndaldy.
Qaraózen men Saryózendegi sý qoımalary Reseıde 46, Batys Qazaqstan oblysy aýmaǵynda 57 paıyzǵa tolǵan.
Fılıal teńgerimindegi sý sharýashylyǵy nysandarynda josparly kózben sholý tekserisi júrgizilip, kóktemgi kezeńge daıyndyq qujattary toltyryldy, búginde nysandar qalypty jaǵdaıda jumys istep jatyr.
– Jyl saıyn sý sharýashylyǵy nysandaryn qalypty tehnıkalyq jaǵdaıda ustaý, sý tasqynyn apatsyz ótkizýge daıyndaý, sý resýrstaryn tıimdi ári utymdy paıdalaný maqsatynda fılıal aǵymdaǵy jóndeý jáne mehanıkalyq tazartý jumystaryn júrgizedi. 2025 jyly 20 nysan jóndelip, 163,7 shaqyrym arna ishinara mehanıkalyq tazartyldy. 2026 jylǵa josparly kórsetkish sáıkesinshe 21 nysan jáne 150 shaqyrymdy quraıdy. Sondaı-aq sý sharýashylyǵy júıeleri men olardyń negizgi jabdyqtarynyń naqty tehnıkalyq jaǵdaıyn baǵalaý maqsatynda gıdrotehnıkalyq ımarattarǵa kópfaktorly zertteý jumystary júrgiziledi. Bul zertteýler ımarattardy durys paıdalanýǵa múmkindik beredi, 2024-2025 jyldary 7 nysanda zertteý jumystary júrgizilip, qaýipsizdik deklaratsııasy jasaqtaldy. 2026 jyly 3 nysanda atalǵan jumystardy atqarý josparlanyp otyr, - dep qosty fılıal basshysy.
Eske sala keteıik, budan buryn Irekli qoımasynan Jaıyq ózenine jiberiletin sý kólemi ulǵaıtylǵanyn jazǵan edik.
Sondaı-aq BQO-da 317 ýaqytsha ornalastyrý pýnkti 32 myń adamdy qabyldaı alatyny habarlandy.