Batys Qazaqstan oblysyndaǵy ózenderde sý deńgeıi túsken
ASTANA. KAZINFORM – Premer-mınıstrdiń keńesshisi Eraly Toǵjanov Úkimet basshysynyń tapsyrmasy aıasynda Batys Qazaqstan oblysynda jumys saparymen bolyp, óńirdiń sý tasqyny kezeńine daıyndyǵyn tekserdi.
Ol jergilikti atqarýshy organdar men tótenshe qyzmet ókilderiniń qatysýymen keńes ótkizip, sý tasqynynyń aldyn alý jáne halyqtyń qaýipsizdigin qamtamasyz etý sharalaryn talqylady.
Ol eń aldymen, Oral qalasyndaǵy sý basý qaýpi bar aýmaqtardy aralady.
Oral qalasy aýmaǵynan 480-myńnan astam tekshe metr qar, 55 148 tekshe metr erigen qar sýy soryldy. Bul jumysty júrgizýge 300-ge jýyq tehnıka jáne 350-den astam jumysshy jumyldyryldy. Qazirgi ýaqytta jaǵdaı turaqty, táýlik boıy kezekshilik uıymdastyrylǵan. Oral qalasyn yqtımal sý tasqynynan qorǵaý maqsatynda jalpy sany — 12 damby turǵyzylǵan. Olardyń uzyndyǵy — 11,4 km.
Sonymen qatar, Premer-mınıstrdiń keńesshisi Qaratóbe, Syrym, Bórli, Terekti jáne Shyńǵyrlaý aýdandarynyń aýmaǵyn áýeden tikushaq arqyly qarady.
Syrym aýdanynyń aýmaǵy arqyly ushý kezinde Araltóbe aýylynyń mańynda sý tasqyny saldarynan buzylǵan kópirdiń qaıta qalpyna keltirý jumystarymen tanysty. Syrym aýdanynda Óleńti ózeniniń boıynda 8,1 shaqyrym sýdan qorǵaý bógeti turǵyzylǵan, onyń ishinde 42 sýdy ótkizý shlıýzi bar.
Budan soń, Premer-mınıstrdiń keńesshisi Qaratóbe aýdany, Qorjyn aýyly Jaqsybaı ózeniniń aýmaǵyn qarap ótti. Byltyrǵy jyly Memleket basshysynyń tapsyrmasy aıasynda sý tasqynynan zardap shekken turǵyndarǵa Qorjyn aýylynda 90 úı salynǵan bolatyn.
Budan soń Eraly Toǵjanov Qaratóbe aýdanynyń ortalyǵyndaǵy Qaldyǵaıty ózenine baryp, sý tasqynyń aldyn alýǵa baǵyttalǵan jumystarmen tanysty. Qar sýynyń erýine baılanysty, Qaldyǵaıty ózeniniń sýy kóterilip, óz arnasy arqyly ótip, jaqyn mańdaǵy joldy buzǵan bolatyn. Osyǵan baılanysty, 32 tehnıka tartylyp, tótenshe jaǵdaılar qyzmetiniń 60 mamany jáne 23 aýmaqtyq qorǵanys qyzmetiniń sarbazdary apat bolǵan tótenshe jaǵdaıdy joıý jumystaryn júrgizdi. Olar ózen jaǵasyn qum toltyrylǵan qapshyqtarmen qorǵaý, sýdy bógeý, joldy qalpyna keltirý jumystaryn júrgizdi. Búginde ózen boıynda 3,7 km bóget salynǵan. Al, jalpy Qaratóbe aýdany boıynsha 10,8 shaqyrym bóget turǵyzylǵan.
Osydan keıin, Eraly Toǵjanov Shyńǵyrlaý ózeniniń boıymen ushyp, Shyńǵyrlaý, Bórli aýdandarynda atqaralyp jatqan jumystarmen tanysty.
Shyńǵyrlaý aýdanynda –3,5 km bóget, al Bórli aýdanyndaǵy ózender boıyndaǵy eldi mekenderde 40 km bóget turǵyzylǵan. Sondaı-aq, Shyńǵyrlaý ózeninde jalpy sany 9,5 myń sharshy metr muz jarylǵan.
Ótken jyly Memleket basshysy Qasym-Jomart Toqaev sý tasqyny kezeńinde Batys Qazaqstan oblysyna kelgen ýaqytta Qaratóbe aýdanynyń turǵyndary Qaldyǵaıty ózeni arqyly ótetin 9 eldi mekendi jalǵaıtyn kópir salý máselesin kótergen edi. Qazirgi ýaqytta kópirdiń jobalyq-smetalyq qujattamalary ázirlenip, memlekettik saraptamadan ótip jatyr. Osy rette, aýyl aqsaqaldarynyń aldynda Eraly Toǵjanov atalǵan sheshimge qoldaý bildiretinin jáne tıisti mınıstrlikke júginip, máseleni sheshý boıynsha járdemdesetinin jetkizdi. Sondaı-aq, Eraly Toǵjanov jergilikti atqarýshy organdar halyqtyń qaýipsizdigin qamtamasyz etý úshin qajetti sharalardy jedel qabyldaı otyryp, jaǵdaıdy tolyq baqylap otyrǵanyn atap ótti.
Mamandardyń málimetinshe, Batys Qazaqstan oblysyndaǵy ózenderde sý deńgeıi túsken. Endigi kezekte Eraly Toǵjanov Reseı tarapymen transshekaralyq ózenderdegi jaǵdaıdy baqylaýda ustap, kúndelikti aqparat almasýdy tapsyrdy.
Jalpy alǵanda, BQO-da sý tasqyny kezeńinde eldi mekenderdi qorǵaý úshin «Demeý Qazaqstan qorynyń» jáne jergilikti bıýdjettiń qarajatymen 4,5 mlrd teńgege uzyndyǵy 143 km qorǵanys bógeti ornatyldy, 9 km sý burý kanaly, 93 km aryq salyndy, 74 km magıstraldyq kanal tazartyldy. Oblys aýmaǵynan 937,1 myń tekshe metr qar shyǵaryldy.
Ózenderde monıtorıngti júrgizý úshin oblysta 29 gıdrobeket jumys jasap istep jatyr.
Sondaı-aq 32 myń adamdy qabyldaı alatyn 317 ýaqytsha ornalastyrý pýnkti daıyn jáne maldy qaýipsiz aımaqtarǵa aıdap aparýǵa arnalǵan 195 oryn bekitldi.
Qazirgi tanda BQO-daǵy barlyq kúsh pen quraldar kúsheıtilgen rejımde, táýlik boıy kezekshilikte jumys atqaryp jatyr.
Aıta ketelik «Aýyl amanaty» baǵdarlamasy boıynsha BQO respýblıkada kósh bastap tur.