Batys Qazaqstan oblysynda toǵyz jaıly mektep salynyp jatyr
ORAL. KAZINFORM — Óńirde úsh jańa mektep ashyldy, taǵy altaýy 2025 jyly paıdalanýǵa beriledi, dep habarlaıdy BQO ákimdigi Qurylys basqarmasynyń baspasóz qyzmeti.
Batys Qazaqstan oblysynda 2023 jyldan 2025 jylǵa deıin Ulttyq joba aıasynda 8100 oqýshyǵa arnalǵan toǵyz jaıly mekteptiń qurylysy júzege asyrylyp jatyr. Joba oqý jaǵdaıyn jaqsartýǵa, oqýshy oryndarynyń tapshylyǵyn azaıtýǵa jáne bilim berý ınfraqurylymynyń jańa standarttaryn engizýge baǵyttalǵan.
— Jaıly mektep — bul jaı ǵana jańa ǵımarat emes. Bul — qaýipsizdik, qoljetimdilik jáne jabdyqtalý boıynsha zamanaýı talaptarǵa saı keletin oqý keńistigi. Árbir mundaı nysan óńirdiń klımattyq erekshelikterin eskere otyryp jobalanady. Keń synyp bólmeleri, zerthanalar, sport zaldary, ashanalar, zamanaýı sanıtarlyq toraptar men balalarǵa arnalǵan demalys aımaqtary qarastyrylǵan. Mindetti túrde múmkindigi shekteýli balalardyń qajettilikteri eskeriledi: pandýstar, lıftiler, beıimdelgen sanıtarlyq toraptar men navıgatsııalyq belgiler bolady, — dep atap ótti BQO qurylys basqarmasynyń basshysy.
Búgingi tańda úsh mekteptiń qurylysy aıaqtaldy. 2024 jylǵy 15 qarashada Oral qalasyndaǵy Derkól kentinde 1500 oryndyq № 51 mektep paıdalanýǵa berildi. 25 jeltoqsanda taǵy eki mektep ashyldy — Oral qalasyndaǵy Balaýsa shaǵyn aýdanynda 1500 oryndyq jáne Terekti aýdanynyń Podstepnoe aýylynda 1200 oryndyq mektep.
Alty mekteptiń qurylysy jalǵasyp jatyr. Atap aıtqanda:
Oral qalasyndaǵy № 65 mektep (600 oryn) — «Jaıyq jaryǵy» JShS, daıyndyq deńgeıi — 61%.
Dostyq kentindegi mektep (Báıterek aýdany) (1200 oryn) — «SF ALTIM» JShS, daıyndyq — 66%.
Trekın kentindegi mektep (Báıterek aýdany) (600 oryn) — «Antarium Group» JShS, daıyndyq — 71%.
Aqsaı qalasyndaǵy № 1 mektep (Bórli aýdany) (300 oryn) — «Altaır SK-7» JShS, daıyndyq — 24%.
Aqsaı qalasyndaǵy № 7 mektep (900 oryn) — sol merdiger, daıyndyq — 14%.
Pýgachev kentindegi mektep (Bórli aýdany) (300 oryn) — «Jaıyq Sıtı» JShS, daıyndyq — 43%.
Barlyq mektep biryńǵaı standarttar boıynsha jabdyqtalady: zamanaýı mýltımedıalyq synyptar, zerthanalar, kitaphana-aqparattyq ortalyqtar jáne qaýipsizdik júıeleri ornatylady. 2025 jyldyń sońyna deıin barlyq toǵyz mektep paıdalanýǵa berilip, óńir balalaryna sapaly oqý men damý úshin jaǵdaı jasalady dep kútilip otyr.
Osyǵan deıin Batys Qazaqstan oblysynda sút óndirisi artyp kele jatqanyn jazǵanbyz.