Batys Qazaqstan oblysynda sý tasqynynan zardap shekkenderge áleýmettik kómek berý jalǵasýda

ORAL. KAZINFORM - Sý tasqynynan zardap shekken turǵyndarǵa 100 aılyq eseptik kórsetkish kóleminde búgingi kúnge deıin oblys boıynsha 6679 otbasyǵa 2,4 mlrd teńge birjolǵy áleýmettik kómek tólendi. Turǵyndardan túsken ótinishter negizinde tólemderdi tóleý jalǵasýda.

BQO ákimdiginiń baspasóz qyzmetiniń habarlaýynsha, qazirgi ýaqytta oblys ákimi Narıman Tóreǵalıevtiń tapsyrmasy aıasynda Oral qalasynda sý tasqynynan zardap shekken saıajaı turǵyndarynyń shyǵynyn esepteý jáne materıaldyq kómek tóleý jónindegi arnaıy komıssııa shtattyq rejımde jumys isteýde.

Komıssııa tekserý aktileri aıasynda sýy ketken saıajaılardy qaraýda. Kezeń-kezeńimen barlyq saıajaılar tehnıkalyq zertteýden ótedi.

Esterińizge sala keteıik, BQO ákimi Narıman Tóreǵalıev ótkende saıajaı turǵyndary ornalasqan Oral qalasyndaǵy evakýatsııalyq pýnktterge baryp, sondaı-aq, oblys ortalyǵynda saıajaı turǵyndarmen kezdesken bolatyn.

Atap óterligi, osyǵan deıin turaqty negizde saıajaı turǵyndarymen kezdesýler ótkizildi, aldaǵy ýaqytta da túsindirý jumystary jalǵasatyn bolady.