Batys Qazaqstan oblysynda 9 bala terezeden qulap ketken
ORAL. KAZINFORM — Batys Qazaqstan oblysynda balalardyń jazataıym oqıǵaǵa ushyraýy kóbeıip ketip otyr.
BQO prokýrorynyń aǵa kómekshisi Dınara Nursultanovanyń óńirlik kommýnıkatsııalar qyzmeti alańynda ótken brıfıngide málim etkenindeı, bıyl óńirde 1-6 jas aralyǵyndaǵy 9 bala (ótken jyly – 7) terezeden qulasa, sonyń segizi Oral qalasynda, bireýi Syrym aýdanynda tirkelgen. Saldarynan bir bala kóz jumdy.
Onyń sózine qaraǵanda, mundaı oqıǵalar balalardy ata-analarynyń qaraýynsyz qaldyrýy jáne eresekterdiń nemquraılylyǵy men jaýapsyzdyǵynan oryn alyp otyr.
«Jazǵy maýsym bastalǵannan beri ýákiletti organdar túsindirý jumystaryn, reıdtik is-sharalardy júrgizip, broshıýralar men qaýipsizdik jadymanalaryn taratty. Tótenshe jaǵdaı organdary 20 kóp balaly otbasynyń úıine tereze blokatoryn ornatty. Osy oraıda aıtarymyz, ata-analar kishkentaı balalaryn qaraýsyz qaldyrmaýy, olardyń tereze janynda ornalasqan jıhazda oınaýyna jol bermeýi qajet. Terezelerge blokatorlar men qulyptar qoıý kerek. Moskıt tory qulaýdan qorǵaýǵa arnalmaǵan, sondyqtan oǵan senýge bolmaıdy», - deıdi D.Nursultanova.
Aǵa kómekshiniń aıtýynsha, bıyl sondaı-aq 7 adam (ótken jyly – 16) sýǵa batyp ketse, sonyń beseýi – jasóspirimder. Oblystaǵy sý daıyndarynda ýákiletti organdar ruqsat bergen 9 kópshilik demalys orny (Oralda – 6, Báıterek aýdanynda – 2, Bórlide – 1) bar.
«Jazǵy demalys kezinde qaýipsizdik erejelerin saqtaý óte mańyzdy. Ata-analardy balalaryn kózden tasa qaldyrmaı, shomylýǵa bolmaıtyn jerlerge barýǵa ruqsat bermeýge shaqyramyz. Bir ǵana mysal, jýyrda, 11 shilde kúni Aqjaıyq aýdany Mergen aýylynda sýǵa túsýge tyıym salynǵan jerden úsh qyzdyń máıiti shyǵaryldy. Olardyń barlyǵy – 8-synyp oqýshylary. Ekeýi – 13-te, bireýi 12 jasta. Qyzdar ata-anasynyń ruqsatymen sýǵa túsken. Mundaıǵa múldem jol berilmeýi tıis», dedi Dınara Esbolatqyzy.
Eske sala keteıik, budan buryn Oralda 5 jasar balanyń tórtinshi qabattan qulap ketkenin jazǵan bolatynbyz. Sondaı-aq BQO-da úsh qyz Jaıyq ózenine batyp ketti.
