Batys Qazaqstan mektepterinde 126 myńnan astam oqýshy bilim alady

ORAL. KAZINFORM — Batys Qazaqstan oblysynda barlyǵy 379 mektep jumys isteıdi.

BQO bilim basqarmasynyń basshysy Eldos Safýllınniń óńirlik kommýnıkatsııalar qyzmeti alańynda ótken brıfıngte málim etkenindeı, óńir mektepterinde 126 myńnan astam oqýshy bilim alady. 

Eldos Nabıollaulynyń sózine qaraǵanda, aldaǵy oqý jylyna 1 synypqa 10,6 myń bala qabyldansa, sonyń 76 paıyzy qazaq tilinde oqıtyn bolady. Qabyldaý 31 tamyzǵa deıin jalǵasady.

- Jańa oqý jyly qarsańynda jergilikti bıýdjet esebinen jalpyǵa birdeı bilim berý qorynan oqýshylarǵa qajetti qural, kıimder alý úshin 8 208 balaǵa 46 myń teńgeden ata-anasynyń esep-shottaryna barlyǵy 379,4 mln teńge aýdaryldy. Sonymen qatar jyl saıyn uıymdastyrylatyn «Mektepke jol» aktsııasy aıasynda 700-den astam jetkinshekke 10 mln teńgege jýyq kólemde keńse taýarlary, kıim-keshek jáne qarjylaı túrde demeýshilik kómek kórsetildi, - dedi E.Safýllın. 

Basqarma basshysynyń aıtýynsha, jańa oqý jylyna deıin «Qarashyǵanaq Petrolıým Opereıtıng b.v.» kompanııasynyń áleýmettik jobalary aıasynda Kaztalov aýdany Qonys aýylynda 60 oryndyq paıdalanýǵa berilmek. Sondaı-aq jyl sońyna deıin «Keleshek mektepteri» aıasynda 6 mektep qurylysy aıaqtalady. Oǵan qosa bilim berý ınfraqurylymyn damytý qorynyń esebinen Oralda № 8 oblystyq daryndy balalarǵa arnalǵan mektep ǵımaraty óz esigin aıqara ashady.

Sondaı-aq oblys boıynsha 6 bilim berý nysanynda kúrdeli jóndeý jumystary júrgizilýde.

Sonyń bireýi jańa oqý jylyna, qalǵan beseýi jyl sońyna deıin máresine jetedi. 

- Bilim berý uıymdarynyń materıaldyq bazasyn nyǵaıtý maqsatynda bıyl 23 kabınet jabdyqtaryn satyp alýǵa oblystyq bıýdjet esebinen 299 mln teńge qarastyryldy. Budan bólek, «Qazaqstan halqyna» qory esebinen 4 aýyl mektebinde 20 kabınet jabdyqtalyp jatyr. Bilim berý mekemelerin qaýipsizdik quraldarymen qamtamasyz etý maqsatynda oblystyq bıýdjetten 304,3 mln teńge bólinip, bilim berý uıymdary 100 paıyz qamtyldy. Sondaı-aq jańa oqý jylynda oqýshylardy oqýlyqtarmen jáne oqý-ádistemelik keshendermen qamtamasyz etý úshin jergilikti bıýdjetten 1 998,8 mln teńge berildi. Qazirgi tańda satyp alynǵan oqýlyqtardy mektepterge jetkizý jumystary júrgizilýde, - dep qosty E.Safýllın. 

Eske sala keteıik, budan buryn Batys Qazaqstanda birinshi synypqa 12 myńǵa jýyq oqýshy qabyldanatynyn jazǵan edik.