Batys Eýropaǵa «meteobomba» qaýpi tónip keledi

ASTANA. KAZINFORM – Kúshti daýyl, «bombalyq tsıklon» dep atalǵan aýa raıy qubylysy Frantsııa, Germanııa jáne Batys Eýropanyń basqa da elderine tónip keledi, dep habarlaıdy Euronews.

Meteorologtardyń málimetinshe, bul – tez kúsheıetin tómengi qysym aımaǵy. Ol sekýndyna 160 km-ge deıingi jetetin ekpindi daýyl, qatty nóser jańbyrlaryn jáne kólik qatynasyndaǵy úzilister sııaqty ekstremaldy aýa raıy qubylystaryn týdyrýy múmkin.

Tsıklon qazirdiń ózinde Frantsııanyń Atlant jaǵalaýyna jetken. Beısenbi túni onyń ortalyǵy La-Mansh buǵazyna jetip, odan keıin Soltústik teńiz baǵytynda Ispanııa, Belgııa, Nıderlandy jáne Germanııany qamtı otyryp qozǵalyp keledi. Shvartsvald aımaǵy men Soltústik teńiz jaǵalaýynda jeldiń ekpini sekýndyna 120 km-ge deıin jáne odan joǵary bolady dep kútilip otyr.

Sınoptıkterdiń boljaýynsha, daýyl juma kúngi túski ýaqytqa qaraı Germanııada eń joǵary núktesine jetedi. Kólik qatynasynda jáne energııamen qamtamasyz etýde qıyndyqtar bolýy yqtımal. Al senbi kúni daýyldyń kúshi báseńdeı bastaıdy, biraq jaǵalaýdaǵy daýyldyń áseri saqtalady.

Meteobomba — bul tsıklon ortasynda qysym 24 saǵat ishinde 24 gPa-dan astam tómendeıtin daýyl. Bul jaǵdaı ýraganǵa uqsas qatty aýa raıyn jáne qaýipti saldardy týdyrady.

Eske sala ketsek, Fılıppındegi dúleı daýyldan 8 adam qaza tapty. 

Al keshe «Qazgıdromet» aýa raıyna baılanysty birneshe óńirde eskertý jarııalady.