Bastapqy satysynda anyqtalǵan qaterli isik emdeledi — onkolog
ALMATY. KAZINFORM — Erte dıagnostıka aýrýdyń asqyný qaýpin azaıtady, keń hırýrgııalyq aralasý nemese qarqyndy hımıoterapııa sııaqty agressıvti emdeý ádisteriniń qajettiligin tómendetedi. Bul týraly Almaty onkologııa ortalyǵy dırektorynyń orynbasary Janna Qujaeva aıtty.
Spıkerdiń sózinshe, Almaty onkologııa ortalyǵynyń negizgi jetistikteriniń biri — onkologııalyq aýrýdy erte dıagnostıkalaý.
Almaty emhanalary onkologııalyq aýrýdyń erte satysynda skrınıngtik zertteý júrgizýde kásibıliktiń joǵary deńgeıin kórsetýdi jalǵastyryp keledi.
Onkologııalyq kómektiń I deńgeıi sheńberinde alǵashqy medıtsınalyq-sanıtarııalyq kómektiń 76 medıtsınalyq uıymy (MSAK) qaterli isikke deıingi jáne obyr aýrýyn anyqtaý boıynsha belsendi jumys isteıdi.
Halyqtyń maqsatty tobyn skrınıngtik tekserýden ótkizý, jatyr moıny, sút bezi jáne toq ishek qaterli isikteri sııaqty aýrýdy ýaqtyly anyqtaýǵa múmkindik beredi.
2024 jyldyń alǵashqy alty aıynda emhanaǵa kelgenderdiń 72%-y tekserý kabınetterinde qaraldy — bul 289 121 naýqas, bul 2023 jyldyń sáıkes kezeńimen salystyrǵanda (248 217 adam) aıtarlyqtaı ósimdi kórsetedi.
Qaterli isikti erte satysynda anyqtaý 40%-ǵa deıin ósti.
2024 jyly 54 186 áıel jatyr moıny obyrynyń skrınınginen ótti, bul josparly qamtýdyń 665-yn qurady.
Jatyr moıny obyrynyń 29 jaǵdaıy anyqtaldy, onyń 85%-yna I kezeńde dıagnoz qoıylǵan.
Toq ishek qaterli isiginiń 28 jaǵdaıy anyqtaldy, onyń 25%-yna I kezeńde dıagnoz qoıylǵan.
Anyqtalǵan aýrýy bar barlyq naýqas mamandandyrylǵan em aldy.
«Erte dıagnostıka emdeýdi erterek bastaýǵa múmkindik beredi, bul sátti emdelý múmkindigin edáýir arttyrady jáne asqyný qaýpin azaıtady, keń hırýrgııalyq aralasý nemese qarqyndy hımıoterapııa sııaqty agressıvti emdeý ádisteriniń qajettiligin azaıtady, bul patsıentterdiń ómir sapasyna oń áser etedi», –deıdi dáriger.
Erte dıagnostıka qaterli isikten bolatyn jalpy ólim-jitimniń tómendeýine yqpal etedi.
«Turǵyndarǵa skrınıng naýqas tirkelgen emhanada júrgiziledi. Tórt jylda bir ret jatyr moıny obyryn erte anyqtaý úshin skrınıngti 30 jastan 70 jasqa deıingi áıelder, eki jylda bir ret sút bezi obyryn erte anyqtaý úshin — 40 jastan 70 jasqa deıingi áıelder, eki jylda bir ret kolorektaldy obyrdy erte anyqtaý úshin — 50 jastan 70 jasqa deıingi erler men áıelder ótýi tıis», — dep qosty Janna Qujaeva.
