Baspasóz kartasy uǵymyn aıqyndaý tásilderi qaıta qaralady – Aıda Balaeva
Baspasóz kartasy uǵymyn aıqyndaý tásilderi qaıta qaralady. Bul týraly Mádenıet jáne aqparat mınıstri Aıda Balaeva aıtty, dep habarlaıdy Kazinform.
«Mınıstrliktiń aqparattyq jumysy medıasferany damytý boıynsha jaǵdaı jasaý, el halqyn memlekettik saıasatty iske asyrý týraly habardar etý jáne aqparattyq qaýipsizdikti qamtamasyz etý sııaqty úsh negizgi quramdas bólikten turady. Ózderińiz biletindeı, osy jyldyń naýryz aıynda Memleket basshysynyń jarlyǵymen sóz bostandyǵyn odan ári qamtamasyz etýge, otandyq medıasferanyń básekege qabilettiligin arttyrýǵa jáne aqparattyq egemendikti nyǵaıtýǵa baǵyttalǵan «Aqparattyq doktrına» bekitildi. Al, tamyz aıynda Úkimettiń Qaýlysymen ony iske asyrýǵa baǵyttalǵan is jospary qabyldandy», - dedi mınıstr Ortalyq kommýnıkatsııalar qyzmetindegi brıfıngte.
Aıda Balaevanyń aıtýynsha, doktrınadan týyndaıtyn asa mańyzdy zań jobalarynyń biri mınıstrlik bastamasymen júzege asqan "Mass-medıa týraly" zań jobasy boldy.
«Ózderińizge belgili, 30 qarashada Parlament Májilisiniń jalpy otyrysy ótti. Onda zań jobasy birinshi oqylymda maquldandy. Qazirgi ýaqytta jumys tobynyń otyrystary aıasynda talqylaý jumystary jalǵasýda. Atap aıtqanda, jýrnalıster men Májilis depýtattarynyń pikirin eskere otyryp, baspasóz kartasy uǵymyn aıqyndaý tásilderi qaıta qaralatyn bolady. Baspasóz kartalaryn berý krıterıılerine keletin bolsaq, birden aıta keteıik, barlyǵy aıtyp júrgen jumys ótili, joǵary bilimi bolý kerek degen ózgerister jalpy jumys toptaryndaǵy talqylaý qorytyndylary boıynsha alynyp tastalady», - dedi ol.
Alaıda, mınıstr qazirgi ýaqytta akkredıtteýdi ońaılatý tásili naqty qandaı formada júzege asyrylatynyn aıtý erte ekendigine nazar aýdartty.
«Ol aldaǵy jumys tobynyń otyrysy barysynda aıqyndalatyn bolady. Jalpy, men buryn atap ótkenimdeı, zań jobasy boıynsha depýtattar 114 túzetý engizdi. Onyń ishinde – 64-i qabyldanyp, 10 túzetý pysyqtalýda. Osy usynystar qazirgi ýaqytta Úkimettiń qorytyndysynda jáne barlyq múddeli memlekettik organdar kelisilgennen keıin Májiliske jiberiletin bolady. Ekinshi tyńdaýǵa deıin barlyq túzetýler boıynsha sheshim qabyldanady», - dedi ol.
