Baspana naryǵynda baǵa qalaı ózgerip jatyr
Ulttyq statıstıka bıýrosy turǵyn úı naryǵyndaǵy ahýal jóninde málimet usyndy, dep habarlaıdy Kazinform agenttigi.
Atap aıtqanda, bıylǵy jáne byltyrǵy qyrkúıek aralyǵyndaǵy baǵany salystyrǵanda:
- jańa turǵyn úılerdi satý 5,7% qymbattady,
- páterlerdi qaıta satý 3,9% arzandady,
- abattandyrylǵan turǵyn úıdi jalǵa alý 0,2% tómendedi.
Jańa salynǵan úıler edáýir qymbattaǵan óńirler:
- Pavlodar – 18,9%,
- Semeı – 16%,
- Aqtaý – 11,7%.
Qoldanystaǵy baspana baǵasy eń kóp kóterilgen qalalar:
- Semeı – 25,3%,
- Qyzylorda – 14,6%,
- Taldyqorǵan – 9,7%.
Jalǵa beriletin baspana quny qymbattaǵan qalalar:
- Qaraǵandy – 24,8%,
- Qonaev – 24,6%,
- Qyzylorda – 22,5%.
Jalpy, turǵyn úıdi alyp-satý boıynsha bıylǵy qyrkúıek aıynda 35 398 mámile jasalǵan. Onyń ishinde jeke úıler – 8 815, kóppáterli úıdegi baspana – 26 583. 2023 jyldyń tamyzymen salystyrǵanda (38 810) úı naryǵyndaǵy mámileler sany 8,8% azaıǵan.
Úı saýdasy Astana (6 731 – 19%) jáne Almaty (6 436 – 18,2%) qalalary men Qaraǵandy oblysynda (3 041 – 8,6%) kóp bolǵan. Baspana eń az satylǵan óńir – Ulytaý, 319 birlik (0,9%).
Bıylǵy qyrkúıekte baspanany satý-satyp alý kelisimderi byltyrǵy qyrkúıekpen salystyrǵanda 2,3% azaıǵan, ol kezde 36 241 mámile resimdelgen bolatyn. Azaıýdyń eń joǵarǵy kórsetkishi Túrkistan oblysynda (26%) tirkeldi. Al Soltústik Qazaqstan oblysynda baspana saýdasy kerisinshe, artqan (22,1%).
