Baspana kezeginde turǵandardyń úlesi qandaı kólemde artty

NUR-SULTAN. QazAqparat – 2019 jyly Turǵynúıqurylysjınaqbanki 361 mlrd teńgege 34 179 zaımdy berdi. Bul týraly «Nurly jer» baǵdarlamasynyń júzege asyrylýyna arnalǵan Úkimet saǵatynda Parlament Májilisi tóraǵasynyń orynbasary Vladımır Bojko málim etti, dep habarlaıdy QazAqparat tilshisi.

«Jalpy, 2018 jyly Turǵynúıqurylysjınaqbanki barlyq nesıeleý túrleri boıynsha 360 mlrd teńgege 39 295 zaımdy, 2019 jyly 361 mlrd teńgege 34 179 zaımdy berdi», - dedi V. Bojko.

Onyń paıymynsha, el halqy baspana alý úshin atalǵan bank júzege asyryp jatqan tetikterdi jappaı paıdalanyp keledi.

«2016 jylǵy 1 jeltoqsandaǵy jaǵdaı boıynsha jergilikti atarýshy organdarda jalpy kezekte 2,5 mln adam tursa, onyń ishinde 400 myńy jergilikti atqarýshy organdarǵa tıeseli, 780 myńy salymshylar, sondaı-aq 1,3 mln adam úı salý úshin jer telimin alýǵa kezekke turǵan. Al 2018 jyldaǵy qańtarda jergilikti atqarýshy organdar men Turǵynúıqurylysjınaqbankinde 2,8 mln adam kezekte turǵan», - dedi Vladımır Bojko.