Baspaldaqtaǵy keptelis: Almatyda mektep dırektory qyzmetinen bosatyldy

ALMATY. KAZINFORM – Almatydaǵy mektepterdiń birinde oqýshy sanynyń kóptiginen balalardyń emin-erkin óte almaı, baspaldaqta keptelip turǵan vıdeosy tarady.

Beınejazbadan balalardyń baspaldaqpen tómen túse almaı jatqanyn kórýge bolady.

Almaty qalalyq bilim basqarmasynyń málimetinshe, bul jaǵdaı №41 mektepte bolǵan.

«Osy jyldyń 27 aqpanynda ekinshi aýysymnan keıin birinshi qabatta ornalasqan mekteptiń kıim aýystyratyn bólmesinde oqýshylar kóp jınaldy. Munyń sebebi - osy kúni oqýshylardyń kıiný protsesiniń durys uıymdastyrylmaýy. Buryn bul mektepte mundaı jaǵdaı bolmaǵan. Mektep ákimshiliginiń málimetinshe, zardap shekkender joq», - dep habarlady basqarmadan.

Oqý protsesin uıymdastyrýda baqylaýdy álsiretkeni úshin mektep dırektory qyzmetinen bosatyldy.

«№41 mektepte eki aýysymda 1426 oqýshy oqıdy, jobalyq qýaty 870 oryn. Osy problemasyn sheshý úshin 2023 jyly Samǵaý shaǵyn aýdanynda 2000 oryndyq jaıly mekteptiń qurylysy bastaldy», - dep atap ótti bilim basqarmasynan.