Bas prokýrordyń orynbasary Talǵardaǵy oqıǵanyń tergelýine túsinik berdi

ASTANA. KAZINFORM – QR Bas prokýrorynyń orynbasary Ǵalymjan Qoıgeldıev Talǵardaǵy qandy oqıǵa boıynsha istiń tergelýine qatysty túsinik berdi.

«Talǵardaǵy kisi óltirý oqıǵasyna qatysty tergeý amaldary turaqty baqylaýda turǵanyn atap ótken jón. Kúdikti adamdar ustaldy jáne aıyp taǵyldy. 15 qazan kúni Іshki ister mınıstriniń birinshi orynbasary Baýyrjan Álenov pen Almaty oblysynyń prokýrory Berik Adamovtyń qatysýymen brıfıng ótip, sol kezde istiń mán-jaıyna qatysty túsinik berildi. Qaıtys bolǵan jasóspirimniń ákesine qatysty eshqandaı qylmystyq is qozǵalmaǵanyn naqty aıta alamyn», - dedi Ǵ. Qoıgeldıev Senattyń jalpy otyrysynan keıin tilshiler suraǵyna jaýap bere otyryp.

Onyń aıtýynsha, qara jamylǵan otbasynyń úıin órteý deregine qatysty is tergelip jatyr. Bul turǵyda tıisti saraptalar jasalyp jatyr.

Eske salaıyq, buǵan deıin 4 qazanda Talǵar qalasyndaǵy tóbelesten 16 jasar jasóspirim qaıtys bolǵanyn jazǵanbyz. 

Ashýly talǵarlyqtar jasóspirim ólimine baılanysty narazylyqqa shyqty.

Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady.

Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy.

12 qazan túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

18 qazan kúni Almaty oblysy prokýrorynyń orynbasary men Talǵar aýdanynyń prokýrory qyzmetinen ketti.