Bas prokýror ózin-ózi órtegen adam úshin biliksiz mamandardy kinálady

ASTANA. QazAqparat - Búgin kásibı memlekettik apparatty qalyptastyrý máselelerine arnalǵan jıynda QR Bas prokýrory Jaqyp Asanov ózin-ózi órtegen adamǵa qatysty mamandardyń biliksizdigin kinálady. Eske sala keteıik, osydan biraz buryn Bas prokýratýra ǵımaratynyń aldynda áıel adam ózin-ózi órtegen bolatyn, dep habarlaıdy QazAqparat tilshisi.

Aıta keterligi, jıynda Bas prokýratýranyń Kadr jónindegi departament basshysy Aleksandr Ogaı mamandardy irikteý jumysy jaıynda baıandaǵan bolatyn. Onyń aıtýynsha, bıyl arnaıy joba aıasynda irikteýdiń jańa júıesi enigiziledi. Alaıda osy jumys barysynda kóptegen olqylyqtar anyqtalǵan.

«Biz qujat qabyldaýdy bes kún emes, bir jarym aı júrgizdik. Shyny kerek, jastar belsendi túrde qatysty. Bir aıdyń ishinde 1 350 adam ótinish berdi. Degenmen, olardyń ishinde tek 378-i ǵana zańdy biletinderin dáleldedi. Al synaqtan 69-aq adam ótti. Nege olaı? Bizdiń talabymyz joǵary da emes. Bizdińshe, negizgi másele - bilim berý deńgeıiniń tómendiginde», - deıdi A. Ogaı.

Onyń sózine qaraǵanda, jalpy, irikteýge 82 ýnıversıtettiń ókilderi qatysyp, 52 joǵary oqý orynnyń túlegi synaqtan óte almadyQyzyl dıplommen oqý ornyn bitirgenderdiń ózi qarapaıym zańdardy bilmeıtin bolyp shyqqan. «Konkýrsqa qatysqan Qazaq gýmanıtarlyq ınnovatsııalyq zań ýnıversıtetiniń bir túlegi bir saǵattyń ishinde eńbek tájirıbesine qatysty tórt-aq jol jazypty. Al essege eki saǵat ketirse de, alty-aq jol shyǵarmany jazyp bergen. Joldasbekov atyndaǵy ekonomıka men quqyq akademııasynyń túlegi úsh saǵat otyryp, 140 sózden turatyn shyǵarma jazdy. Esesine ol 53 orfografııalyq qate jiberdi. Tipti synaqtan ótken 62 úmitker psıxologtyń synyna shydaı almady. Olardyń esirtki, alkogol, oıyn-saýyq pen sýıtsıdke jaqyn ekeni anyqtaldy. Rasynda, bizge botanıkter kerek emes. Naǵyz kásibı mamandar qajet», - dedi departament basshysy.

Dál osy sátte QR Bas prokýror Jaqyp Asanov baıandamashyny toqtatyp: «Men keshirim suraımyn, bir apta buryn bizdiń ǵımaratymyzdyń aldynda bir adam ózin-ózi órttep jiberdi. Endi, oılanyp kórińizshi, biz jańaǵy aıtylǵan mamandardy jumysqa alsaq, ne bolady? Iá, olarda dıplom bar. Biraq ondaı qyzmetkerler xalyqpen sóılese ala ma? Azamattardyń muń-muqtajyn túsine ala ma? Negizi, aqshany ǵana oılaıtyn joǵary oqý oryndaryn jabý qajet. Ákimshilik resýrstarmen emes, ata-analardyń sanasyna jetkizý arqyly, jastarǵa keńinen túsindirý arqyly ondaı bilimniń túkke turmaıtynyn ashyq kórsetýimiz kerek», - dep atap kórsetti J.Asanov. Onyń aıtýynsha, búginde prokýrorlar qatarynda zańdy buzatyn mamandar áli de bar.