Bas prokýratýra saılaý naýqany talaptaryn buzǵan úshin qandaı jaza qoldanylatynyn túsindirdi
«Prezıdenttiń kezekten tys saılaýy ótetini týraly jarııalanǵan sátten bastap, Bas prokýratýra saılaý naýqanynyń barlyq kezeńderine qatysty ár deńgeıdegi prokýrorlar úshin negizgi mindetter men uıymdastyrýshylyq is-sharalardy aıqyndady. Keshe oblys prokýrorlarymen jeke keńes ótkizip, olardy saılaý týraly zańnama normalarynyń múltiksiz saqtalýyn qamtamasyz etýge baǵyttadyq. Búgin saǵat 18:00-de eń belsendi kezeń – saılaý aldyndaǵy úgit bastaldy. Ony ótkizý tártibi «QR saılaý týraly» Konstıtýtsııalyq zańmen rettelgen», - dedi J. Ómirálıev Ortalyq saılaý komıssııasynda ótken jıanlysta.
J. Ómirálıev belgilengen normalardy saqtamaý jaýapkershilikke ákep soǵatynyn aıtty. Ákimshilik quqyq buzýshylyq týraly Kodekste saılaý aldyndaǵy úgittiń tártibi men sharttaryn buzǵany úshin 9 bap kózdelgen. Olar: saılaý aldyndaǵy úgitti oǵan tyıym salynǵan kezeńde júrgizý (102-bap – 15-35 AEK aıyppul); saılaý aldyndaǵy úgitti júrgizý quqyǵyna kedergi keltirý (103-bap – 20-50 AEK aıyppul); BAQ arqyly saılaý aldyndaǵy úgitti júrgizý sharttaryn buzý (112-bap – 2-50 AEK aıyppul); Buqaralyq aqparat quraldary arqyly úgit júrgizý sharttary «QR saılaý týraly» Konstıtýtsııalyq zańnyń 27-babynda belgilengen.
Sonymen birge, anonımdik úgitteý materıaldaryn daıyndaý nemese taratý Ákimshilik quqyqbuzýshylyqtar týraly kodekstiń 113-baby (25 AEK) boıynsha ákimshilik aıyppul salýǵa ákep soǵady. Úgit materıaldaryn qasaqana joıý, búldirý (114-bap – 15 AEK aıyppul); saılaýǵa baılanysty qoǵamdyq pikirge saýalnama júrgizý sharttaryn buzý (120-bap – 10-30 AEK aıyppul); saılaý aldyndaǵy úgit-nasıhat júrgizý sharttaryn buzý (122-bap – 20-30 AEK aıyppul) da quqyqbúzýshylyq bolyp sanalady.
Saılaý quqyqtaryna qol suǵatyn osy jáne basqa da ákimshilik quqyqbuzýshylyqtar boıynsha óndiristerdi qozǵaý prokýrordyń aıryqsha quzyretine kiredi. Іsterdi sot qaraıdy. Biraq azamattar ózderiniń saılaý quqyǵyn buzǵan jaǵdaıda óz betinshe tikeleı sotqa da júgine alady. Bul jaǵdaıda atalǵan sanattaǵy isterdi birden sot qaraıdy, biraq mindetti túrde prokýror qatysady.
«Ákimshilik jazamen qatar saılaý zańnamasyn buzǵany úshin qylmystyq jaza ta kózdelgen. Ol saılaý quqyqtaryn júzege asyrýǵa nemese saılaý komıssııalarynyń jumysyna kedergi keltirýge qatysty, Qylmystyq kodekstiń 150-baby – 100 AEK aıyppuldan bastap, túzetý jumystaryn, bas bostandyǵyn shekteýdi qosa alǵanda, 4 jylǵa deıin bas bostandyǵynan aıyrýdy kózdeıdi. Ekinshi quram – saılaý qujattaryn burmalaý nemese daýystardy durys eseptemeý, ol úshin Qylmystyq kodekstiń 151-babynda 4 myń AEK mólsherine deıin aıyppul salý ne túzeý jumystary nemese 4 jylǵa deıin bas bostandyǵynan aıyrý nemese shekteý jazasy belgilengen. Qazirgi ýaqytta saılaý naýqany quqyqtyq sheńberde ótip jatyr. Saılaý zańnamasyn buzý faktileri tirkelgen joq», - dedi J. Ómirálıev.
