Bas prokýratýra: Qordaıda tártipsizdik jasaǵandardyń basym bóligi – jastar men jumyssyzdar
«Osy jyldyń 7-8 aqpanynda Qordaı aýdanynyń úsh aýylynda 2 myńnan astam adamnyń qatysýymen jappaı tártipsizdikter boldy. Sonyń saldarynan 11 adam qaza boldy, onyń 10-y óltirilgen. Bir adamnyń máıiti órtengen saýda úıiniń arasynan tabyldy. 140 adam men 20 polıtsııa qyzmetkeri túrli jaraqat aldy. 164 turǵyn úı men saýda nysany, 100-den astam avtomashına búlindi. 342 adam jábirlenýshi dep tanyldy. 400-den astam túrli sot saraptamalary jasaldy. Myń jarymnan astam adamnan jaýap alyndy», - dedi Rızabek Ojarov Ortalyq kommýnıkatsııalar qyzmetinde ótken onlaın baspasóz máslıhatynda.
Spıker tártipsizdikterdi bastaýshylardyń jáne olarǵa qatysqandardyń janjaldasqan eki taraptan da bolǵanyn atap ótti. Qylmystyq jaýapqa 59 adam tartylyp jatyr, olardyń arasynda túrli ult ókilderi, sonyń ishinde qazaqtar men dúngender bar.
Memleket basshysy Qasym-Jomart Toqaevtyń tapsyrmasymen Qordaı oqıǵasy boıynsha Qylmystyq isterdi tergep-tekserý erekshe baqylaýǵa alyndy. Osy maqsatta Bas prokýror arnaıy prokýrordyń basshylyǵymen vedomstvoaralyq tergeý tobyn qurdy.
«Biz adam óltirý, jappaı tártipsizdikterge qatysý, polıtsııa qyzmetkeriniń ómirine qol suǵýshylyq, urlyq, tonaý, qaraqshylyq jáne múlikti joıý faktileri boıynsha 29 qylmystyq isti tergep-tekserip jatyrmyz. Kúsh qoldanǵan jáne Masanshy, Bulan batyr, Aýqatty aýyldary turǵyndarynyń múlkin qıratýǵa, órteýge, buzýǵa qatysqandardyń negizgi bóligi – jastar, jumyssyzdar. Olardyń arasynda adam óltirý, qaraqshylyq, buzaqylyq, tonaý, zorlaý úshin sotty bolǵandar da bar. Tártipsizdik barysynda qylmystar densaýlyq pen azamattardyń múlkine barynsha zııan keltirý úshin atys qarýyn, «Molotov kokteıli» dep atalatyn jandyrǵysh qospalaryn, tastar men ózge de qolda bar quraldardy paıdalaný arqyly jasalǵan», - dedi ol.
Al kúdiktilerdiń oqıǵaǵa qatystylyǵy kýálardyń aıǵaqtarymen, eldimekenderde ornalasqan beınekameralarmen, uıalfy telefonǵa túsirilgen qolda bar beınejazbalar arqyly rastaldy. Jappaı tártipsizdikterge qatysqany anyqtalǵan árbir kúdiktiń áreketine is boıynsha jınalǵan barlyq aıǵaqqa muqııat taldaý jasaǵannan keıin baǵa berildi. Bostandyqta júrgen 12 kúdikti adamǵa jeke kepilgerlik túrindegi bultartpaý sharasy tańdalǵan.
«Kinásin moıyndaǵandary, tergeýge kómekteskender, qylmys jasaýdaǵy ekinshi deńgeıdegi rólde bolǵandar otbasylyq jáne densaýlyq jaǵdaılary eskerile otyryp 8 adam qamaýdan bosatyldy. Kúzet qoıylǵan adamdardyń quqyqtaryn iske asyrý maqsatynda Karantın jaǵdaıynda barlyq qamaýdaǵylarǵa týystarymen beınebaılanys arqyly sóılesýge múmkindik berildi. Vedomstvoaralyq tergeý toby istiń mán-jaıyn tolyq obektıvti, jan-jaqty zertteýdi qamtamasyz etý boıynsha jumysty jalǵastyrýda. Basqa aqparat Qylmystyq-protsestik kodekstiń 201-babyna sáıkes jarııalaýǵa jatpaıdy», - dedi spıker.
Sonymen birge, Arnaıy prokýrorlary qyzmetiniń basshysy kúdiktilerdiń zań aldynda birdeı ekenin aıtyp, turǵyndarǵa úndeý jasady.
«Qurmetti azamattar! Sońǵy kezderi ártúrli adamdar tarapynan júrgizilip otyrǵan tergeý-tekserýdiń obektıvti emestigi jáne aǵattyqpen júrgizilgeni týraly rastalmaǵan aqparat aıtylyp júr. Tergeý úshin barlyq kúdikti ultyna qaramastan, Qazaqstan Respýblıkasynyń azamattary bolyp sanalatynyn erekshe atap ótkim keledi. Bizdiń negizgi zańymyz – Konstıtýtsııa ultyna baılanysty qandaı da bir kemsitýge tyıym salady. Tergep-tekserý barysynda tek qana Qylmystyq protsestiń zańnamalyq normalaryn basshylyqqa alamyz. Barlyq kúdiktiler bilikti zańgerlik kómekpen qamtamasyz etilgen. Olar qatysatyn árbir tergeý is-qımyly advokattyń kóz aldynda ótedi. Vedomstvoaralyq jedel tergeý toby músheleriniń quqyqqa syıymsyz áreketteri týraly barlyq habarlamalar men ótinishter muqııat tekseriledi. Qazirgi ýaqytta olardyń áreketterinen qandaı da bir zańbuzýshylyqtar anyqtalǵan joq. Azamattardy shynaıy emes málimetti taratpaýǵa jáne tek qana resmı aqparatqa senýge shaqyramyn», - dedi Rızabek Ojarov.
Eske sala ketsek, 7 aqpan kúni Jambyl oblysy Qordaı aýdanyndaǵy Masanshy aýylynyń turǵyndary arasynda jappaı tóbeles boldy.
Oqıǵa týraly tolyq aqparatty arnaıy aıdardan oqýǵa bolady.
foto: azh.kz