Bas prokýratýra qandaı JEO tekseredi

ASTANA. QazAqparat – QR Bas prokýratýrasy elimizdegi jylý elektr ortalyqtaryn tekseredi, dep habarlaıdy QazAqparat tilshisi.

«Jyl elektr ortalyqtaryna qatysty tekserý júrgizýdi sózsiz josparlap otyrmyz. Biraq qazirgi ýaqytta jylytý kezeńin eskere otyryp, barlyq JEO-ny qamtymaımyz. Keıbir tekserýler atalǵan JEO-lardyń qalypty jumysyna kedergi keltiretindigin túsinemiz», - dedi QR Bas prokýrorynyń orynbasary Jandos Ómirálıev vedomstvonyń bıylǵy jumysyn qorytyndylaýǵa arnalǵan baspasóz máslıhatynda BAQ ókilderiniń saýalyna oraı.

Onyń aıtýynsha, prokýratýra, ókiletti organdardyń aralasýy qajet etiletin JEO-lar Ekibastuzdaǵy jaǵdaı qaıtalanbas úshin tekseriletin bolady. Qazirgi ýaqytta Rıdder JEO qyzmetine tekserý júrgizilip jatyr.

Sonymen qatar Ekibastuzdaǵy jylý nysandary tekserý qolǵa alynǵan.

«Tekserý qorytyndysy boıynsha qylmystyq is qozǵaldy. Qalǵan JEO-lar men jylý-energetıka nysandaryn da mindetti túrde tekseretin bolamyz», - dedi Bas prokýrordyń orynbasary.

Buǵan deıin Bas prokýratýra Ekibastuzdaǵy apatty tergeý eki aıǵa deıin sozylatynyn aıtqan bolatyn.

Eske salaıyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.

Keıin jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.

28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.

Apat sebebi retinde jylý jelileriniń tozýy, jylý ortalyǵy basshylyǵynyń nemquraılylyǵy men ınvestıtsııa jetkiliksizdigi ataldy.

7 jeltoqsanda barlyq kópqabatty úı jylýǵa qosylǵany málim boldy.

8 jeltoqsanda Prezıdent Qasym-Jomart Toqaevqa esep bergen Pavlodar oblysynyń ákimi Asaıyn Baıhanov Ekibastuzdaǵy jylý júıesin qalpyna keltirý 15 jeltoqsanǵa deıin aıaqtalatynyn aıtty.

Osy kúni qalada tótenshe jaǵdaı rejımi alyndy.