Bas prokýratýra elektrondyq format qylmystyq protseske ne beretinin túsindirdi
«Zań jobasyna tsıfrlaýdy engizdik. Endi isti elektrondyq túrde júrgizýge bolady. Bul ne úshin qajet? Aldymen, tsıfrly format adamnyń quqyǵyn qorǵaýdy nyǵaıtady. Sebebi barlyq protsess alaqandaǵydaı kórinip turady. Bastysy - sot pen prokýrordyń baqylaýy artady. Endi jasyrý, jalǵan qujat jasaý degen múmkin emes. Sonymen qatar sybaılas jemqorlyq pen qyzmet babyn teris paıdalaný faktileri de azaıady. Bul - tsıfrlandyrýdyń eń basty maqsaty», - dedi M. Ahmetjanov «Qazaqstan Respýblıkasynyń keıbir zańnamalyq aktilerine quqyqtyq qorǵaý qyzmetiniń protsestik negizderin jańǵyrtý máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda.
Onyń sózine qaraǵanda, atalǵan format saladaǵy úderisti tıimdi ári qolaıly etedi.
«Elektrondy is júrgizýge kóshken kezde biraz uıymdastyrý sharalary joıylady. Bir japyraq qujat alý úshin qazirgi tártipke saı úsh táýlik ótedi, al endi sonyń barlyǵyn bir saǵatta uıymdastyrýǵa bolady. Bul rette tergeýshiniń ýaqytyn únemdeıdi, asa aýyr qylmystarǵa kóbirek nazar aýdarýǵa múmkúndik beriledi», - dedi ol.
M. Ahmetjanovtyń aıtýynsha, QR Іshki ister mınıstrligimen jáne Qarjy mınıstrligimen birlese qanatqaqty joba iske asyrylýda. Osy oraıda 400-den astam is elektrondy formatta aıaqtaldy. Sottar 200 elektrondy sanktsııa berdi.
«ІT-júıeni prokýratýrada jasadyq. Bıýdjetten eshqandaı qarjy talap etken joqpyz. Bul baǵyttaǵy sharalar barlyq qylmystyq protsesti tolyq qamtıdy, ıaǵnı qylmystyq tirkeýden bastap, sotqa deıingi tergeýdi jáne jazanyń oryndalýy úderisin eskeredi», - dedi Bas prokýrordyń orynbasary.
