Bas prokýratýra blokcheın tehnologııasyn engizýde

ASTANA. QazAqparat - Bas prokýratýranyń Quqyqtyq statıstıka jáne arnaıy esepke alý komıtetinde blokcheın tehnologııasy boıynsha prokýratýra qyzmetkerlerine arnalǵan úsh kúndik semınar-trenıng ótkizildi, dep habarlaıdy vedomstvonyń baspasóz qyzmeti.

Shara Eýropa odaǵynyń «Qazaqstandaǵy qylmystyq sot tóreligin jetildirý» (EUCJ) jobasynyń járdem kórsetýimen  uıymdastyryldy.

Trenıngtiń maqsaty - aqparattyq tehnologııalar ónimderiniń qaýipsizdigin, aqparattyń ózgermeýiniń kepildigin, sondaı-aq derbes derekterdiń qorǵalýyn qamtamasyz etý úshin blokcheın tehnologııasyn prokýratýra jumysyna engizý.

Táýelsiz sarapshy, álemdegi eń tanymal aqparattyq-saraptamalyq  resýrstardyń biri «Blockchain» negizin salýshy - Edıge Davletgalıev blokcheın tehnologııasyn qoldaný tájirıbesimen bólisti. Ol atalǵan tehnologııanyń arhıtektýrasy, ony memlekettik sektorǵa ıntegratsııalaý múmkindikteri, halyqaralyq standarttar turǵysynan derekter jelisin jetildirý múmkindikteri týraly aıtyp berdi, sondaı-aq blokcheındi jasaýdyń negizgi sátterin is júzinde kórsetti.

Semınar qatysýshylary alǵan bilimder men meńgergen daǵdylar Bas prokýratýranyń «Ákimshilik quqyq buzýshylyqtardyń biryńǵaı tizilimi» jobasyn úshinshi adamsyz, blokcheındi qoldaný arqyly iske asyrýǵa kómektesetinin atap ótti.

Bul tehnologııany engizýdiń nátıjesinde derekter, onyń ishinde ákimshilik quqyq buzýshylyqtar týraly burmalaý boldyrylmaıdy, azamattar aıyppuldardyń, olardyń tólengeni týraly derekterdiń t.b. durystyǵyna senimdi bolady.

Blokcheın - birkelki bólingen jeke-jeke derekter bazasynda saqtalatyn shıflanǵan aqparat (tsıfrly esepke alý jýrnaly).

Blockchain termıni onyń mindetteri men maqsatyna sıpattama beredi: «Block» - blok, qursaý, «chain» - tizbek. Osylaısha, qatań rettilikti ustanatyn bloktar tizbegi. Bloktardaǵy aqparat kodtalǵan krıptografııalyq nysanda saqtalady. Bloktardy ózgertý úshin búkil tizbek boıynsha eski bloktar týraly aqparatty retimen esepteý qajet.

Blokcheınge barlyq derekter jınaqtalady jáne turaqty túrde tolyqtyrylyp otyratyn derekter bazasy qalyptastyrylady. Bul derekter bazasynan bir nárseni alyp tastaý nemese blokty aýystyrý/basqasyn qoıý múmkin emes. Ol «sheksiz» - onda tranzaktsııanyń sheksiz sanyn jazýǵa bolady. Blokcheınniń basty erekshelikteriniń biri osy.