Bas prokýratýra Almasbek Sadyrbaıǵa qandaı aıyp taǵyp otyrǵandaryn aıtty
ASTANA. KAZINFORM – Bas prokýratýra Kazinform saýalyna joldaǵan jaýapta sýbsıdııa shemasymen 1,2 mlrd teńge jymqyrdy degen kúdikke ilingen «Shańyraq» qoǵamdyq birlestiginiń basshysy Almasbek Sadyrbaıdyń isi nege Qarjylyq monıtorıng agenttiginen arnaıy prokýrorlarǵa ótkenin túsindirdi.
- Qazirgi tańda A. Sadyrbaı QK-niń 190-babynyń 4-bóliginiń 2-tarmaǵymen kózdelgen qylmystyq quqyq buzýshylyq jasady degen kúdikpen Almaty jáne Jetisý oblystary boıynsha Qylmystyq-atqarý júıesi departamentine qarasty tergeý ızolıatorynda kúzetpen ustaý túrindegi bultartpaý sharasymen qamaýǵa alynǵan, - dep jazylǵan jaýapta.
Aıta ketý kerek, bul tarmaq osy baptyń alǵashqy 3 bóliginde kórsetilgen qylmystardy asa iri mólsherde jasaǵan jaǵdaıda qoldanylady. Onyń ishinde memlekettik fýnktsııalardy oryndaýǵa ýákilettik berilgen adamǵa teńestirilgen tulǵa retinde adamdar tobymen sóz baılasa otyryp, óziniń qyzmet babyn paıdalana otyryp, aqparattyq júıeni paıdalanýshyny aldaý nemese senimin teris paıdalaný arqyly memlekettik satyp alý salasynda eki nemese odan da kóp adamǵa qatysty birneshe ret jasalǵan alaıaqtyq jolmen bótenniń múlkin jymqyrý nemese bóten múlikke quqyqty ıemdený áreketteri bar. Kúdiktini sot kináli dep tanysa, múlki tárkilenip, 10 jylǵa deıin bas bostandyǵynan, ómir boıyna belgili bir qyzmettermen aınalysý quqyǵynan aıyrylýy múmkin.
Eske salsaq, áýelde Qarjylyq monıtorıng agenttigi Almasbek Sadyrbaıdy Qylmystyq kodekstiń 189-baby boıynsha qamaýǵa alǵan bolatyn.
Bas prokýratýra bul is ózderiniń qaraýyna nege alynǵanyn bylaısha túsindiredi:
- Atalǵan qylmystyq is Qylmystyq-protsessýaldyq kodekstiń 194-babynyń negizinde Almaty oblysy boıynsha Ekonomıkalyq tergep-tekserý departamentinen tergeý rettiligimen Almaty oblysy prokýratýrasynyń Sotqa deıingi tergep-tekserý basqarmasynyń óndirisine qabyldanǵan. Búgingi kúni qylmystyq is boıynsha sotqa deıingi tergep-tekserý júrgizilýde. QPK-niń 201-babynyń talaptaryna sáıkes, tergep-tekserýdiń ózge málimetteri jarııa etýge jatpaıdy, - dep jazady Bas prokýratýradaǵylar.
Atalǵan kodekstiń 194-babynyń 3-tarmaǵynda is tym kúrdeli bolsa, ári ádil júrgizilip jatqanyna kúmán týyndasa, qylmystyq isti prokýratýra ózi qaraýy múmkin ekenin aıtylǵan.