Bas prokýratýra 400-den astam saıtty ekstremızmmen aıyptap otyr»- respýblıkalyq basylymdarǵa sholý
***
QR Prezıdenti Nursultan Nazarbaev óziniń Almatydaǵy rezıdentsııasynda elimizge resmı saparmen kelgen jáne Túrkitildes memleketter yntymaqtastyq keńesiniń І Sammıtine qatysý úshin kelgen Ázerbaıjan Respýblıkasynyń Prezıdenti Ilham Alıevpen kezdesti. Osyǵan oraı el gazeti «Egemen Qazaqstanda» «Áriptestiktiń áleýeti zor» degen taqyryppen kólemdi maqala basyldy. Basylymnyń atap ótýinshe, eki memleket basshylarynyń qatysýymen shaǵyn jáne keńeıtilgen quramdaǵy kelissózder ótip, onyń qorytyndysy boıynsha Qazaqstan men Ázerbaıjan prezıdentteriniń Birlesken deklaratsııasyna qol qoıyldy. Maqalany egjeı-tegjeıli oqyǵyńyz kelse, gazettiń juma kúngi nómirin jiberip almańyz.
«Munaı - jahandyq ekonomıkanyń qozǵaýshy kúshi. Ýaqyttyń ózi dáleldegen bul tujyrymdy búkil álem áldeqashan moıyndaǵan. Qazaqtyń baǵy úshin Tabıǵat-ana qasıetti jomart dalamyzdy qara altynnan da kende qaldyrmapty. Mine, osy qazynamyzdyń arqasynda biz ókpeni qysqan óliara kezeńderdiń qıyndyǵyna tótep berip, dúnıe júzin turalatqan keshegi jahandyq ekonomıkalyq jáne qarjy daǵdarysynan da taqyrlanbaı shyqtyq», - dep jazady «Egemen Qazaqstan» gazeti «El ıgiligi turǵysynan» degen taqyryptaǵy maqalasynda. Basylymnyń atap ótýinshe, ókinishke oraı, qazynaly jerimizdegi munaı men gaz kenishteri jetkilikti bolsa da, ondaǵy memleket úlesi áli de mardymsyz. Jalpy, munaı-gaz shıkizatyn óndirýdegi memleketimizdiń úlesi qazirgi tańda 27 paıyz deńgeıinde ǵana. Al kómirsýtegi shıkizatyn óndirýdiń basym áleýeti sheteldik kompanııalardyń enshisinde qalyp otyr.
***
«Bas prokýratýra elimizde ekstremızmge shaqyratyn, sondaı-aq terrorıstik aktilerdi qoldaýǵa baǵyttalǵan materıaldar jarııalaǵan 400-den astam saıttardy anyqtaǵanyn aıtady. Bul týraly keshe jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov málim etti», - dep jazady «Alash aınasy» gazeti búgingi sanyndaǵy «Bas prokýratýra 400-den astam saıtty ekstremızmmen aıyptar otyr» degen taqyryptaǵy maqalasynda. Resmı ókildiń derekterine sáıkes, prokýratýranyń 215 saıtqa qatysty talap-aryzy men Baılanys jáne aqparat mınıstrliginiń 11 saıtqa qatysty aryzy sot qaraýynda jatyr. Sonymen qatar 100-den astam saıt boıynsha talap-aryz daıyndalý ústinde.
2017 jylǵy Dúnıejúzilik 28-shi qysqy Ýnıversıada Almatyda óte me, joq pa? Aýqymy men mańyzdylyǵy jaǵynan Olımpıadada oıyndarynan keıingi dúbirli dodany mańǵaz Alataý bókterinde ótkizýge qol jetkizemiz be, joq pa? Mine dál osy saýaldarǵa «Alash aınasy» gazetinde jaryq kórgen «Almatyda Ýnıversıada ótkize alamyz ba?» degen maqalada jaýap berilýge tyrysylǵan.
***
Elimizdiń joǵary oqý oryndaryna oqýlyq aýadaı qajet. Osy olqylyqtyń ornyn toltyrýǵa qam jasap júrgen Úkimet oǵan arnaıy qarjy bólip, taıaýda birqatar oqýlyqtyń tusaýy kesildi. Atalǵan jaıtty arqaý etken «Aıqyn» gazetiniń jazýynsha, Bilim jáne ǵylym mınıstrliginiń qoldaýymen tehnıkalyq, ekonomıkalyq baǵyttarǵa arnalǵan 72 oqýlyq taza qazaq tilinde jaryq kórdi. «Tuńǵysh ret el bıýdjetinen 130 bazalyq oqýlyqty shyǵarý úshin 137,7 mıllıon teńge qarjy bólindi. Bul - joǵary oqý oryndaryn oqýlyqpen qamtamasyz etýge degen alǵashqy qadam», - deıdi Bilim jáne ǵylym mınıstri B.Jumaǵulov. Maqala «Jetpis eki oqýlyq jaryq kórdi» degen taqyryppen berilgen.
***
«Kazahstanskaıa pravda» gazetiniń jazýynsha, QR Kólik jáne kommýnıkatsııa mınıstri Berik Kamalıev pen Ázirbaıjan Respýblıkasynyń kólik mınıstri Zııa Mamedov Ázirbaıjan Prezıdenti Ilham Álıevtiń elimizge resmı sapary aıasynda Qazaqstan men Ázirbaıjan arasynda teńiz saýda keme qatynasy týraly úkimetaralyq kelisimge qol qoıdy. Atalǵan kelisim teńiz kóligi salasyndaǵy eki memleket arasyndaǵy ózara yntymaqtastyq qujatynyń negizin qalaýshy bolyp tabylady. Úkimetaralyq kelisimniń basty maqsaty - teńiz arqyly tasymaldaýlar salasynda týyndaıtyn quqyqtyq qatynastardy retteý. Atap aıtqanda, taraptar eki memlekettiń aılaqtaryn teń paıdalaný, kemelerdi erkin óńdeý, taraptardyń quzyretti organdary beretin uqsas qujattardy taný, ekinshi taraptyń kemelerin qutqarý kezinde kórsetiletin kómek óz kemelerine kórsetiletin kómekpen birdeı bolýyn bekitti.
