Bas múftı Sátbaev qalasyndaǵy oqıǵaǵa qatysy pikir bildirdi

NUR-SULTAN. QazAqparat – Qazaqstan Musylmandary dinı basqarmasynyń tóraǵasy, Bas múftı Naýryzbaı qajy Taǵanuly Sátbaev qalasyndaǵy oqıǵaǵa qatysty pikir bildirdi, dep habarlaıdy QazAqparat tilshisi.

«Keshe ǵana qabyrǵamyzdy qaıystyratyn, janymyzǵa batatyn jaǵdaılar jóninde estip qaldyq. Osy tusta, qurmetti halaıyq, biz barynsha sabyrlyq tanytaıyq. Biz – quqyqtyq memleketpiz. Qylmyskerler mindetti túrde jazasyn zań aıasynda alatyn bolady. Tek bul kezde tártip saqtamaı, baıqamaı kishkentaı jaǵdaıdy úlkenge aınaldyryp almaıyq, qurmetti aǵaıyn. Osy tusta quqyq qorǵaý organdaryna osy máseleni ashyq qarap, halyqqa shynaıy aqparat berse degen úmittemiz. Alla barshamyzdyń tilegimizdi qabyl etsin», - dedi Bas múftı Ortalyq kommýnıkatsııalar qyzmetinde.

Eske sala ketsek, búgin Іshki ister mınıstri Erlan Turǵymbaev Sátbaevtaǵy bes jasar qyz balanyń joǵalýyna qatysty oqıǵanyń mán-jaıyn aıtyp bergen bolatyn.

«23 shilde kúni keshki saǵat 9-da Sátbaev qalasynyń ishki ister basqarmasyna 5 jasar qyzdyń joǵalǵany týraly aryz tústi. Dereý izdestirý nátıjesinde búldirshin qaladaǵy bir úıden tabyldy. Jas qyzdy zorlady degen kúdikpen bir azamat qamaýǵa alyndy. Biraq birneshe adam kúdiktini óz qolyna berýdi talap etti, janjal shyǵardy», - dedi Erlan Turǵymbaev OKQ-da ótken baspasóz máslıhatynda.

Sondaı-aq, búgin Prezıdent Shornaq aýyly men Sátbaev qalasyndaǵy jaǵdaıǵa baılanysty keńes ótkizdi.