Bas múftı Naýryzbaı qajy Taǵanuly referendýmda daýys berdi

NUR-SULTAN. QazAqparat – Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Nur-Sultan qalasyndaǵy Oqýshylar saraıynyń ǵımaratynda ornalasqan №59 referendým ýchaskesine baryp, daýys berdi, dep habarlaıdy QazAqparat tilshisi.

«Búgin osy eldiń azamaty retinde Ádiletti, Jańa Qazaqstan qurý jolynda jasalyp jatqan ıgi bastamalardy qoldap, referendýmǵa qatysyp, óz tańdaýymdy jasadym. Biz el bolashaǵyn jarqyn etý jolyndaǵy tarıhı qadamdardy qoldaımyz jáne halyqty birlik pen yntymaqqa úndeımiz. Búgingi referendým joraly jurtymyzdyń birligi men berekesi úshin oń serpin beredi degen senimdemin. Alla Taǵala elimizge amandyq, jurtymyzǵa tynyshtyq násip etip, táýelsizdigimizdi baıandy etkeı. Ámın», - dedi Bas múftı Naýryzbaı qajy Taǵanuly buqaralyq aqparat quraldaryna bergen suhbatynda.

Esterińizge sala keteıik, saǵat 14.00-degi jaǵdaı boıynsha 6 262 973 adam daýys berdi.

Bul - tizimge engizilgen azamattardyń 53,43 paıyzy.

Zańǵa sáıkes, eger referendýmǵa qatysýǵa quqyǵy bar azamattardyń jartysynan kóbi daýys berýge qatysqan bolsa referendým ótkizilgen dep sanalady.

Osylaısha, aýmaqtyq referendým komıssııalarynyń derekterine sáıkes, zańmen belgilengen kelýshige qol jetkizilip otyr.