Bas múftı qazaqstandyqtardy bir-birine janashyrlyqpen qaraýǵa shaqyrdy
«Qazaqy dúnıetanymymyzda da, san ǵasyrdan beri ustanyp kele jatqan asyl dinimiz Islamda da «jaqyn» degen uǵym tek qana úıdegi ata-ana, aǵa-baýyr, áıel, bala-shaǵaǵa qatysty qoldanylmaıdy. Allanyń aq jolyn, Paıǵambarymyzdyń (oǵan Allanyń salaýaty men sálemi bolsyn) súnnetin ustanyp kele jatqan halqymyz úshin kórshi de, alys-jaqyn aǵaıyn-týys, dos-jaran jaqyny sanalady.Búgin Memleket basshysy Qasym-Jomart Toqaev Qazaq eline úndeý jasady. Syn saǵatynda synbaı, bir-birimizge qaraılasyp, qol ushyn sozyp, shama kelgenshe materıaldyq jáne moraldyq qoldaý bildirip, eń bastysy, osy indet órship turǵan shaqta saqtyq sharalaryna basa kóńil bólýge taǵy da úndedi. Qara jamylyp otyrǵan otbasylarǵa kóńil aıtyp, aýyryp jatqandarǵa saýyǵyp ketýin tiledi. Buǵan qosa, Prezıdent 13 shilde – Ulttyq aza tutý kúni bolyp belgilengenin málimdedi», - dedi Bas múftı.
QMDB tóraǵasynyń atap ótýinshe, musylmandar tutas bir aǵza sekildi. Qol synsa, kóz qýanǵan emes, bálkim, ol úshin jasyn tógedi, al kózden jas aqsa, ony qol súrtedi.
«Osy oraıda men de el Prezıdentiniń Úndeýine tolyqtaı qosyla otyryp, el azamattarynan bir-birine janashyrlyqpen qarap, shama kelgenshe qoldaý kórsetýge, járdemdesýge shaqyramyn. Ómirin báıgege tigip, ult saýlyǵy úshin aıanbaı eńbek etip jatqan aq halatty abzal jandarǵa alǵysymdy bildiremin. Sondaı-aq dári-dármekti, eń qajetti turmystyq zattar men azyq-túlikti osyndaı qıyn-qystaý mezgilde qymbattatpaýǵa shaqyramyn. Al barsha qazaqstandyqtardy 13 shilde kúni barsha álemniń Rabbysy bir Alladan duǵa tilep, kóp ıstıǵfar aıtyp, Paıǵambarymyzǵa (oǵan Allanyń salaýaty men sálemi bolsyn) kóptep salaýat aıtyp, sol kúni bir mezette respýblıka ımamdarynyń, medrese ustazdarynyń Quran Hatym duǵasyna qosylýǵa shaqyramyn. Barshańyzǵa Alla Taǵalanyń sálemi men raqymy, bereketi bolsyn! Alla qalasa bul kúnderdi de birligimizben eńseremiz!», - dedi Naýryzbaı qajy Taǵanuly.
