Bas múftı «qara juma» sózin «jomart juma» dep ózgertýge úndedi

NUR-SULTAN. QazAqparat – Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly elimizdegi saýda ortalyqtarynyń ıeleri men barsha kásipker azamattardy kópshilik oryndarynda jazylǵan «qara juma» sózin «jomart juma» dep ózgertýge shaqyrdy, dep habarlaıdy QazAqparat tilshisi.

«Keıingi jyldary jurtty jappaı saýdaǵa tartýdyń ádisi retinde qoldanylyp júrgen «qara juma» sózi qoǵamda talqyǵa túsýde. Dinimiz ben dástúrimizde bar «juma» sózi qasıetti, qasterli uǵymdy bildiredi. Men osy rette elimizdegi saýda ortalyqtarynyń ıeleri men barsha kásipker azamattardy «qara juma» sózin «jomart juma» dep ózgertýge shaqyramyn»,- dedi Bas múftı úndeýinde.

Qazaqstan musylmandary dinı basqarmasynyń tóraǵasy «jomart juma» – júrekke jyly tıetin, halqymyzdyń uǵymyna da saı keletin sóz ekendigin basa aıtady.

«Musylman qaýymy úshin juma qasıetti kún bolǵandyqtan, «qara jumany» «jomart juma» dep ózgertsek, bul – Islam dinin ustanatyn halqymyzǵa kórsetilgen qurmet bolmaq. Osylaısha, kásipker azamattarymyz izgi nıetiniń nátıjesinde «jomart juma» aktsııasy aıasynda qanshama jannyń alǵysyna bólener edi», - dedi Naýryzbaı qajy Taǵanuly.