Bas ekolog batysta kıik sany shekten tys kóbeıip ketkenine pikir bildirdi

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Serikqalı Brekeshev Batys Qazaqstan oblysy turǵyndarynyń kıik sany shekten tys kóbeıip ketkeni týraly shaǵymyna pikir bildirdi, dep habarlaıdy QazAqparat tilshisi.

«Batys Qazaqstan oblysynda jergilikti turǵyndar kıik pen úı janýarlary arasynda belgili bir báseke bar ekenin aıtyp júr. Sondyqtan búgin keshke orman sharýashylyǵy men janýarlar álemine jaýapty vıtse-mınıstr, tıisti komıtet tóraǵasy osy óńirge attanady. Sol jerde jergilikti ákimdik ókilderimen birge óńir halqyna túsindirý jumysyn júrgizedi. Osy sapar aıasynda jumys toby qurylady dep oılaımyn», - dedi mınıstr Úkimet otyrysynan keıin BAQ ókilderiniń suraǵyna bergen jaýabynda.

Onyń sózine qaraǵanda bul jumys toby kıik sanyn retteý yqtımaldyǵy máselesin zerdelep kóredi.

«Barshaǵa aıtqym keletini, eger kıik sanyn retteý sharasy qolǵa alynsa, tek bıologııalyq negizdemege súıenip iske asyrylady. Ázirge naqty sheshim shyqqan joq. Jumys toby qurylady. Ol jumys tobyna janýarlardy qorǵaý uıymdarynyń ókilderi de, halyqaralyq sarapshylar da tartylady. ıAǵnı, ǵalymdarymyz kıik sanyn retteý qajet dese, tıisti sheshim talqylaýǵa engiziledi», - dedi Serikqalı Brekeshev.

Sondaı-aq, ol óńirdegi eki tabıǵı qaýmalda ári ketse 350 myń kıiktiń tirshilik etý múmkindigi bar ekenin jetkizdi.

«Qazir Batys Qazaqstan oblysynyń aýmaǵynda Bókeıorda rezervaty qurylǵanyn biletin shyǵarsyz. Aşyózek rezervaty da bar. Biraq bul eki rezervatqa shamamen 250-300 myń bas kıik syıady. Ǵalymdarymyzdyń qorytyndysyna qaraǵanda kıikterdiń Jaıyq popýlıatsııasynyń shekti sany 350 myń bastyń aınalasynda bolýy múmkin. Qaıtalap aıtaıyn, ázirge kıik sanyn retteý kerek degen sheshim joq», - dedi mınıstr.

Buǵan deıin BQO ákimi Ǵalı Esqalıev jergilikti sharýalardyń múddesin qorǵaý úshin kıiktiń sanyn retteý qajet degen paıym aıtqan bolatyn.