«Barselona» klýby álemdegi eń kedeı elden 44 mln eýro alady

ASTANA. KAZINFORM — «Barselona» (Ispanııa, Katalonııa) klýby Kongo Demokratııalyq Respýblıkasymen 44 mln eýro turatyn tórt jyldyq iri demeýshilik kelisimge qol qoıýǵa jaqyn, dep habarlaıdy Mundo Deportivo. 

Bul kelisim boıynsha klýb jylyna 11 mıllıon eýro alady.

Katalonııa klýby eldegi týrızmdi ilgeriletýge baǵyttalǵan «Demokratııalyq Kongo — Afrıkanyń júregi» logotıpin klýb jeıdesine ornalastyrady. Maýsym aıynyń basynda Frantsııa 1-lıgasynyń «Monako» klýby da afrıkalyq elmen osyndaı kelisimge qol qoıǵan edi.

Bul kelisim Barselonadaǵy qarjylyq feır-pleı jaǵdaıyn jaqsartýǵa kómektesýi kerek ekendigi atap ótildi. Buǵan deıin UEFA Katalonııa klýbyna osy másele boıynsha 12 mıllıon eýro aıyppul salǵan bolatyn.

Kongo Demokratııalyq Respýblıkasy paıdaly qazbalarǵa baı el jáne álemdegi eń iri kobalt óndirýshi sanalady. Degenmen, kobalttyń 20 paıyzy qolmen óndiriledi. Quqyq qorǵaý uıymdarynyń málimetinshe, 2024 jyly Kongo Demokratııalyq Respýblıkasyndaǵy shahtalarda 4-10 jas aralyǵyndaǵy 7,5 mıllıonǵa jýyq bala aýyr jumysqa tartylǵan. Biraq elde balalarǵa sanaq júrgizilmegendikten, naqty sandar belgisiz.

Sonymen qatar, ıÝNISEF málimetteri boıynsha, eldegi qarýly qaqtyǵystarǵa baılanysty balalardy memlekettik jáne memlekettik emes qarýly kúshter júk tasýshy, tyńshy nemese qyzmetshi retinde belsendi túrde alady. Máselen, 2024 jyly mundaı jumysqa 1 mıllıonnan astam bala tartylǵan.

Kongo Demokratııalyq Respýblıkasy mys, kobalt jáne ýranǵa baı bolǵanymen, álemdegi eń kedeı bes eldiń qataryna kiredi. El halqynyń 65 paıyzǵa jýyǵy (shamamen 100 mıllıon adam) kúnine 2,15 dollardan az aqshaǵa kún kóredi.

Eske sala keteıik, 30 jyldan keıin Kongo men Rýanda beıbit kelisimge qol qoıdy.