Barlyq bólim tehnıkamen tolyq qamtyldy dep aıtýǵa erte - mınıstrlik

ASTANA. QazAqparat – Barlyq bólimder tehnıkamen tolyq qamtamasyz etildi dep aıtýǵa erte. Ortalyq kommýnıkatsııalar qyzmetinde ótken brıfıngide Tótenshe jaǵdaılar birinshi vıtse-mınıstri Ibragım Kúlshimbaev osylaı málimdedi, dep habarlaıdy QazAqparat tilshisi.

«Bizdiń barlyq bólimder tehnıkamen tolyq qamtamasyz etildi dep aıtýǵa erte. Qazirgi tańda tehnıkamen jabdyqtaý deńgeıi – 60 paıyz. Mınıstrlik bul baǵyttaǵy máselelermen aınalysyp jatyr. 2022 - 2024 jyldary qajetti arnaıy tehnıkalardy satyp alý josparlanǵan. Onyń nátıjesinde tehnıkamen jabdyqtaý deńgeıi 80 paıyzǵa jetedi. Biz bul oraıda respýblıka bıýdjetin de eskeremiz. Máselen, 2023 jylǵa tehnıkamen jabdyqtaý jumystaryna 207 mlrd teńge bólindi. Bul – iri soma. Budan bólek, órt sóndirý bólimderine qosymsha jergilikti bıýdjetten qarajat beriledi. Buǵan deıin jabdyqtaýǵa 53-80 mlrd teńge kóleminde qarjy bólinetin», - dedi QR Tótenshe jaǵdaılar birinshi vıtse-mınıstri.

Sonymen qatar, Ibragım Kúlshimbaev tótenshe jaǵdaılar salasyndaǵy kadr tapshylyǵy máselesine qatysty pikir bildirdi. Onyń aıtýynsha, búgingi tapshylyq 10 paıyzǵa jetpeıdi.