Barlyq jaǵdaı jasalǵan, biraq qol qýsyryp otyra almaımyz – «Teńizde» turyp jatqan Qulsary turǵyndary
ATYRAÝ. KAZINFORM – Sý basqan Qulsary qalasynyń 34998 turǵyny qaýipsiz aımaqqa kóshirildi. Onyń ishinde 7445 adam «Teńiz» ken ornyndaǵy jataqhanalarda turyp jatyr.
«Teńizshevroıl» JShS Úkimetpen jáne jurtshylyqpen baılanys bóliminiń bas menedjeri Aıbek Qrambaevtyń málimetine súıensek, kompanııa Jylyoı aýdanyndaǵy sý tasqynynyń zardabyn joıýǵa 2 mlrd teńge bólgen.
«2-4 sáýir aralyǵynda Jylyoı aýdanyndaǵy tasqyn sýǵa qarsy jumystar úshin 90-ǵa jýyq arnaıy tehnıka, avtobýstar, azyq-túlik jáne janar-jaǵarmaı jiberdi. Turǵyn úıin sý basqan turǵyndar úshin vahtalyq kenttegi jataqhanalardan oryn daıyndaldy. Mundaı kómek áli de jalǵasady», - deıdi ol.
Qazir Qulsary qalasy men Turǵyzba aýylynyń 7445 turǵyny vahtalyq kenttegi jataqhanalarda. Turǵyndar kompanııanyń avtobýstarymen evakýatsııalandy. Olardyń deni – balaly áıelder men qarttar. Arasynda júkti analar bar.
«Evakýatsııalanǵan turǵyndardyń bári jatyn orynmen, ystyq taǵammen, qajetti medıtsınalyq kómekpen qamtamasyz etilip otyr. Turǵyndar kún saıyn medıtsınalyq tekserýden ótkiziledi. Júkti analardyń densaýlyǵyn qadaǵalaý úshin arnaıy maman shaqyryldy», - deıdi Aıbek Qrambaev.
Onyń aıtýyna qaraǵanda, munda balalarǵa erekshe kóńil bólinip otyr. Óıtkeni, olar mundaı jaǵdaıǵa tez úırene almaýy múmkin. Sol sebepten, balalar úshin túrli oıyn uıymdastyrylady. Tipti kınoteatr ashylǵan. Munda balalarǵa qazir elimizdiń eń iri kınoteatrlarynda kórsetilip jatqan mýltfılmder usynylady.
Turǵyndarǵa TShO men merdiger mekemelerdiń qyzmetkerlerinen bólek, eriktiler de kómekke kelgen. Kompanııa qyzmetkerleri gýmanıtarlyq kómek jınap, ushaqpen «Teńizdegi» vahtalyq kent pen Qulsary qalasyna jetkizip jatyr.
«Eshkimge de ońaı emes. Sý kele salysymen zattarymyzdy jınap, túnde vahtalyq qalashyqqa keldik. Munda ómir súrýge jaqsy jaǵdaı jasalyp otyr. Ózimizdi úıdegideı sezinemiz. Ashanada taǵamnyń túr-túri bar. Meıramhanadaǵydaı as mázirin tańdaýǵa bolady. Bizge jaqsy qyzmet kórsetiledi», - deıdi Maqpal Shaharbaeva.
Onyń pikirinshe, turǵyndardyń, ásirese balalardyń qaýipsizdigine basa mán berilgen. Balalar oınaýǵa shyqsa, kúzetshiler baqylaıdy, ıaǵnı qaýipsizdik qatań saqtalady.
Aıta ketsek, áleýmettik jelide kishkentaı balanyń sońynan júgirgen osyndaǵy kúzetshiniń sýreti tarady. Bul sýret kópshiliktiń júzine kúlki uıalatqan edi.
«Teńizde» óte súıkimdi «másele» paıda boldy» degen pikir jazǵandar bar.
Vahtalyq kenttiń ýaqytsha turǵyndary úshin balalar bári qyzyq. Máselen, qoqys suryptaýǵa arnalǵan túrli-tústi konteınerler tańsyq kóringen.
«Munda qoqystyń barlyǵyn suryptaıdy eken. Tańerteń balalarymdy ertip, qoqystardy suryptaý nelikten mańyzdy ekenin túsindirdim. Qulsaryǵa oralǵan soń men de qoqystardy suryptaýdy bastaımyn. Tipti bir mınýtta qansha lıtr sýdy únemdeýge bolatyny týraly nusqaýlar jazylyp qoıylǵan. Bir qaraǵanda, qarapaıym ǵana nárse sekildi ǵoı. Biraq, «Teńizdegi» vahtalyq kentke kelgenge deıin buǵan onsha mán bermeppin. Munda «Aýada kúkirtti sýtegi sasyp jatyr» degendi estýshi edim. Bul shyndyqqa janaspaıtyn sekildi. Osynda kelgeli basym aýyrmaıtyn boldy. Aýa taza eken. Al, taza aýa kúsh-qýat beredi. Óndiris orny bolǵanymen, munda kólikter de az», - deıdi bes balanyń anasy Aınagúl.
Qulsary qalasyn sý basqanda aldymen «Aspar Kashagan» seriktestigi kómekke umtylypty. Ol – «Teńizshevroıl» merdigerleriniń biri. Seriktestik basshylyǵy tehnıkalyq qoldaý men gýmanıtarlyq kómekten bólek, vahtalyq kenttegi jataqhanalarǵa 700-den astam adamdy jaıǵastyrýǵa sheshim qabyldady.
«Biz Jylyoı aýdanynda jumys isteımiz. Osyndaı qıyn kúnderde jylyoılyqtarǵa qalaı kómektespeımiz? Evakýatsııalanǵan turǵyndar azyq-túlikpen jáne medıtsınalyq kómekpen qamtamasyz etildi. Qazir balalar jalyqpaýy úshin túrli týrnır uıymdastyryp jatyrmyz», - deıdi seriktestiktiń óndiristik menedjeri Saltanat Súleımenova.
Al, «Caspian Offshore Construction Realty» seriktestigi ıeligindegi «Bolashaq» vahtalyq qalashyǵynda 3000 adam ornalasqan. Bul – «Teńiz» kenishindegi úlken jataqhanalardyń biri. Qalashyq meńgerýshisi Ǵalymjan Ábirdiń aıtýynsha, olar tórt saǵatta qajetti bólmelerdi daıyndap, 2 myńnan astam adamdy qabyldaǵan. Qazir munda ornalasqan turǵyndar sany 3 myńǵa jetti.
«Árqashan qansha bólme jáne tamaq qajet ekenin aldyn ala josparlaıtyn edik. Biraq, bul joly bári basqasha bolyp, Qulsary turǵyndaryn tez qabyldadyq. Olardyń sý tasqynynan keıin úreıge boı aldyrǵanyn, tipti ýaıymdaǵanyn bilemiz. Sondyqtan bizdiń ujym turǵyndar úshin qoldan kelgenniń bárin jasaýǵa tyrysty. Qazir turǵyndar úreıden arylyp, ózderin úıdegideı sezinedi», - deıdi Ǵalymjan Ábir.
Qulsary qalasynan evakýatsııalanǵan áıelder munda bos júrgen joq. Olardyń keıbiri vahtalyq qalashyqtaǵy aspazdarǵa, endi bireýleri tehnıkalyq qyzmetkerlerge kómektesip júr. Olar osyndaı qıyn sátterde bir-birine qoldaý kórsetý mańyzdy ekenin túsinedi.
«Iá, biz – munda ýaqytsha qonaqpyz. Ony ózimiz de sezinip júrmiz. Biraq, tańerteńnen keshke deıin qol qýsyryp otyrǵymyz kelmeıdi. Sondyqtan biz qyzmetkerlerge kómektesemiz. Kómekteskenniń esh aıyby joq», - deıdi Qulsarydan evakýatsııalanǵan áıelderdiń biri.
Sondaı-aq, «Neftestroıservıs» seriktestigi qyzmetkerleri balalarmen jaqsy qarym-qatynas ornatqan. Kompanııa jataqhanalarynda 100-den astam adam turady. Olardyń kópshiligi – kishkentaı balalar men áıelder. Kompanııa balalardy kınoteatrǵa aparǵan.
«Endi balalarǵa kúnine birneshe ret mýltfılmder kórsetetin bolamyz. Kınoteatrǵa basqa jataqhanalarǵa ornalasqan balalar da keledi. Balalardyń vahtalyq qalashyqtan jaqsy áser alǵanyn qalaımyz. Keıin estelik retinde aıtyp júretin bolady», - deıdi seriktestiktiń eńbek qatynastary jónindegi menedjeri Azamat Ótemisov.
Taǵy bir merdiger – «Senimdi qurylys» seriktestigi Qulsary qalasy men Turǵyzba aýylynan evakýatsııalanǵan 800-ge jýyq turǵyndy qabyldapty. Kásiporyn turǵyndardy kúndelikti medıtsınalyq tekserýden ótkizip, turmysqa qajetti taýarlardyń barlyǵyn qamtamasyz etip otyr.
«Sý tasqynynan zardap shekken turǵyndardyń kópshiligi – qarttar, balalar men júkti analar. Sondyqtan turǵyndardyń densaýlyǵyn qadaǵalaýǵa arnaıy medıtsına mamandaryn shaqyrdyq. Bizdiń qaýipsizdik qyzmetkerleri kún saıyn turǵyndarǵa nusqaýlar ótkizedi. Óıtkeni, úılerin sý basqan turǵyndarǵa psıhologııalyq qoldaý kórsetý óte mańyzdy. Osyǵan baılanysty árbir adamǵa jaıly jaǵdaı jasap, qoldaý kórsetýdi kózdedik. Kez kelgen másele boıynsha qolymyzdan kelgendi jasaýǵa bar kúshimizdi salyp otyrmyz», - deıdi kompanııa dırektorynyń orynbasary Jazıra Ánesqyzy.
Eske sala ketelik, buǵan deıin Atyraýdaǵy Jylyoı aýdanynan 35 myńǵa jýyq turǵyn evakýatsııalanǵanyn jazǵan edik.
