«Barys» on bir oıynǵa sozylǵan sátsizdikten keıin jeńiske jetti

ASTANA. KAZINFORM - Qazaqstandyq «Barys» komandasy búgin Qurlyqtyq hokkeı lıgasyndaǵy kezekti oıynyn Reseıde «Admıral» (Vladıvostok) komandasyna qarsy ótkizdi.

Kezdesý barysynda qazaqstandyq komanda birinshi kezeńde nátıjeli oınaı bildi. Olardyń qatarynan Evgenıı Rymarev 13, Entonı Kamara 18-mınýtta mergendik tanytty.

Ekinshi kezeńde Evgenıı Rymarev taǵy bir márte qaqpany dál kózdep, basymdyqty arttyra tústi. Oǵan 44-mınýtta «Admıral» sapynan Aleksandr Gorshkov bir golmen jaýap qaıyrdy.

Úshinshi kezeńde keıbir sátterde reseılik klýbtyń basymdyǵy baıqalyp turdy. Oıynnyń bitýine tórt mınýt qalǵanda reseılik komanda qaqpashyny alty hokkeıshige almastyrdy. 

Nátıjesinde «Barys» qarsylasynan 3:2 esebimen basym tústi.

Osylaısha «Barys» qatarynan on oıynǵa sozylǵan sátsizdikten keıin jeńiske jetti.

Komandalar 13 aqpanda da ózara kezdesken edi. Bul oıynda elordalyq hokkeıshiler qarsylasyna 2:4 esebimen ese jibergen edi.

Eki komanda buǵan deıin 34 márte kezdesken. Onyń 18-i elordalyq klýbtyń basymdyǵymen aıaqtalsa, qalǵan oıyndarda reseılik komanda jeńiske jetken.

Endi elordalyq hokkeıshiler aldaǵy eki oıynyn 16 jáne 18 aqpanda «Amýr» (Habarovsk) komandalaryna qarsy ótkizedi.