«Barys» komandasy Reseıdiń «Severstal» komandasynan basym tústi

Qazaqstandyq «Barys» komandasy Qurlyqtyq hokkeı lıgasyndaǵy kezekti oıynyn elordada Reseıdiń «Severstal» (Cherepovets) komandasyna qarsy ótkizdi, dep habarlaıdy Kazinform.

Astanalyq klýb úshin bıylǵy maýsym sátti boldy dep aıtý qıyn. Sońǵy 10 oıynnyń nebári úsheýinde jeńiske jetti. Saldarynan týrnır kestesinde «Barys» 28 oıynnan keıin 23 upaımen 21-orynda turǵan edi. 

Búgingi kezdesýde esepti reseılik klýb ashty. Olardyń qatarynan Nıkıta Korostelev 16-mınýtta mergendik tanytty. Ekinshi kezeńde elordalyq klýb qatarynan úsh shaıba soǵyp, esepte alǵa shyqty. Úsh goldyń úsheýinde de qazaqstandyq Batyrlan Muratovtyń kómegi tıdi. Aldymen odan pas alǵan Ádilbek Beketaev 27-mınýtta shaıba soqsa, Kırıll Savıtskıı 29-mınýtta kózdegen nysanadan múlt ketken joq. Al 33-mınýtta Batyrlan Muratov esepti ústemeleı túsip, 50-mınýtta ekinshi márte mergendik tanytyp, oıynnyń núktesin qoıdy. 

Osylaısha «Barys» qarsylasynan 4:1 esebimen basym tústi. Nátıjesinde qatarynan úsh márte jeńilisten keıin sátsizdikter serııasy toqtady. 

Endi elordalyq klýb aldaǵy oıynyn 16 qarashada Reseıde «Traktor» (Chelıabi) komandasyna qarsy ótkizedi. 

Aıta keteıik, qazaqstandyq «Barys» komandasy Qurlyqtyq hokkeı lıgasyndaǵy kezekti oıynyn elordada Reseıdiń «Severstal» (Cherepovets) komandasyna qarsy ótkizetinin jazǵan bolatynbyz.