«Barys» «Ak Bars» komandasynan qatarynan jetinshi márte jeńildi

ASTANA. KAZINFORM — Qazaqstandyq «Barys» komandasy búgin Qurlyqtyq hokkeı lıgasyndaǵy kezekti oıynyn Reseıde «Ak Bars» (Qazan) komandasyna qarsy ótkizdi.

Kezdesý barysynda reseılik hokkeıshiler alǵashqy mınýttan belsendilik tanytty. Nátıjesinde olardyń tarapynan 9-mınýtta Dmıtrıı ıAshkın mergendik tanytyp, óz komandasyn alǵa shyǵardy.

Al 12-mınýtta reseılik hokkeıshi Kırıll Semenov basymdyqty arttyrsa, Kırıll Lıamkın 43, Egor Korshkov 44, Nıkıta Dynıak 56-mınýtta mergendigimen kózge tústi. 

Osylaısha «Barys» qarsylasynan 0:5 esebimen jeńilip qaldy.

Eki komanda buǵan deıin 53 márte kezdesken. Onyń 11-i elordalyq klýbtyń basymdyǵymen aıaqtalsa, qalǵan oıynda reseılik komanda jeńiske jetken.

Keıingi alty oıynda qazaqstandyq klýb atalǵan qarsylasyna ese jibergen edi. Jetinshi matchta da olardyń osal tusyn taba alǵan joq.

Endi qazaqstandyq komanda 21 qyrkúıekte «Vıtıaz» (Podolsk) klýbymen oınaıdy.

Odan keıin elordada 24 qyrkúıekte Reseıdiń «Dınamo» (Máskeý), 26 qyrkúıekte «Sochı», 28 qyrkúıekte «Vıtıaz» (Podolsk), 30 qyrkúıekte «Torpedo» (Nıjnıı Novgorod) komandalarymen kezdesedi. 

Eske salsaq, budan buryn «Barys» Reseıde «Avtomobılıst» (Ekaterınbýrg) komandasyn overtaımda 2:1 esebimen súrindirdi.

Aıta ketsek, oǵan deıin elordalyq klýb Astanada Reseıdiń «Neftehımık» (Nıjnekamsk), «Traktor» (Chelıabınsk), «Amýr» (Habarovsk), Belarýstiń «Dınamo» (Mınsk) komandalarynan jeńilip qalǵan edi.