Bári qajettilikke baılanysty – Arhımed Muhambetov Qostanaıda qazaq mektebin kóbeıtý týraly
«BAQ betterinde «Qostanaıda jalǵyz qazaq mektebi jabylǵaly jatyr» degen aqparattyń shyqqany ras. Ol málimettiń shyndyqqa janaspaıtynyn jarııaladyq. Atalǵan 24-shi mektep-gımnazııa óz qalpynda, jabylǵan joq. Qazirgi tańda oblysta 498 mektep bar. Sonyń 120-sy memlekettik tilde sabaq berse, 118 mektep - aralas, qalǵany - orys tildi mektepter. Memlekettik tilde sabaq beretin mektepterdiń sanyn kóbeıtip jatyrmyz. Mysaly, 1 qyrkúıekte «Áýejaı» shaǵyn aýdanynda 900 oryndyq jańa mektep ashtyq. Burynǵy kolledjdiń ǵımaratynda da 900 oryndyq mektep-gımnazııa jumysyn bastady. Qazir Amanqaraǵaı aýylynda jańa mektep salynyp jatyr. Ol da tek memlekettik tildegi mektep bolmaq. Qarasý aýdan ortalyǵynda da mektep ashylady. Bul baǵytta, álbette, jumys júrgizemiz. Biraq, bári qajettilikke baılanysty», - dedi Arhımed Muhambetov OKQ-da ótken baspasóz máslıhatynda.
Aımaq basshysy másele mektep salýmen shektelmeıtinin, qajetti kadrlar kerektigin de atap ótti.
Aıta ketsek, osy jyldyń jazynda áleýmettik jeliler men aqparattyq basylymdarda Qostanaıdaǵy jalǵyz qazaq mektebi jabylǵaly jatqany týraly aqparat taraǵan bolatyn. Alaıda, oblys ákimdigi muny joqqa shyǵaryp, qalada 6 qazaq mektebi baryn jarııa etken.
