«Barbı úıiniń» qazaqsha balamasy kópshilikke usynyldy
Future-forým «Jańa tolqyn 100+» - buryn-sońdy Qazaqstanda bolmaǵan formattaǵy startap alańy. Munda bir ýaqytta jas startaperler aqparattyq tehnologııa, áleýmettik sala, qaıyrymdylyq salalaryndaǵy óz jobalaryn ınvestorlarmen bólisip, talqylaýǵa múmkindik alady.
Jobalardyń barlyǵy «Rýhanı jańǵyrý» baǵdarlamasy aıasynda etnomádenı birlestiktermen birige otyryp jasalady.
«Munda óńirlerden 300-ge jýyq ıdeıadan 100 shaqty ótinim tústi. Olardyń 50-i iriktelip alyndy. 30 joba óńirlerden bolsa, qalǵan 20-25 joba - Almaty oblysyna tıesili. Onyń ishinen 13 myqty joba ınvestorlar nazaryna usynyldy», - dedi «Jańǵyrý joly» jastar qozǵalysynyń óńirlik shtabynyń jetekshisi Islam Kýraev.
Olardyń arasynda eksklıýzıvti ıdeıalar da bar.
«Máselen, etnokonstrýktordy alaıyq. Mundaǵy maqsat - 3-12 jas aralyǵyndaǵy balalar arasynda ulttyq dástúrlerdi nasıhattaý. Mynaý - «Barbı úıiniń» qazaqsha balamasy. Buıymdar plastıkten emes, taza ekologııalyq shıkizattan jasalady. Joba jetekshisi Aıdar Beksultanovtyń aıtýynsha, osyndaı etnokonstrýktor shyǵaratyn 3 myńǵa jýyq konstrýktor Qytaı, Reseıde kóp. Qazaqstanda bir óndirýshi joq. Sondyqtan olarǵa qoldaý kerek. Ulttyq biregeılikti saqtaýǵa, patrıotızmge tárbıeleýge yqpal etetin joba asa kóp aqshany talap etpeıdi», - deıdi Islam Kýraev.
Al Astanadaǵy №3 perınataldyq ortalyqtyń medqyzmetkeri Rýzı Shıhov qan donorlyǵynyń tapshylyǵyn joıý maqsatynda arnaıy saıt pen «Donormyn» mobıldi qosymshasyn jasaýdy usyndy.
Rýdnyı men Qaraǵandy qalasynyń ókilderi óz qalalarynda elektrondy PIK pen kovorkıng ortalyqtar ashqysy keledi.
«Jobalardyń barlyǵy aldyn-ala ınvestorlarǵa jiberildi. Olar kóp jobaǵa qyzyǵýshylyq bildirdi. Atap aıtqanda, búgingi jıynǵa iri bıznes ókilderi qatysty. Investorlardyń keıbiri bir nemese birneshe jobaǵa qoldaý bildirmek. Al kásibı mamandar jobany jetildirý boıynsha sarapshylyq baǵasyn berdi»,- dedi Islam Kýraev.
Bolashaqta mundaı forým jyl saıyn ótkizilmek.
