Bankter telekommýnıkatsııa salasyna rekordtyq kólemde nesıe bóldi

NUR-SULTAN. QazAqparat – 2019 jyly bank sektory telekommýnıkatsııa salasyna rekordtyq kólemde qaryz bóldi, dep habarlaıdy QazAqparat Ranking.kz aqparat kózine silteme jasap.

«2019 jyldyń jeltoqsan aıynda aqparat jáne baılanys salasynda berilgen nesıe kólemi 4,6 mlrd teńgeni qurap, bul kórsetkish bir aı burynǵy deńgeıden 22,1 paıyzǵa tómen. Sonymen qatar, 2018 jylǵy jeltoqsan aıymen salystyrǵanda 9,1 paıyzǵa az boldy. Ótken jyly berilgen nesıelerdiń eń qomaqty somasy mamyr aıynda tirkeldi, ıaǵnı 94,2 mlrd teńgege jetip, rekordtyq kórsetkishti baıqatty. 2018 jyly bul salada berilgen qaryzdyń eń joǵary somasy maýsym aıynda tikelip, 19,6 mlrd teńge deńgeıinde bolǵan edi» delingen habarlamada.

Jalpy, 2019 jyldyń qańtar-jeltoqsanynda aqparat pen baılanys salasynda berilgen nesıe kólemi rekordtyq 131,8 mlrd teńgege jetti. 2018 jylǵa qaraǵanda ósim 2,6 eseni qurady.

Ótken jyldyń sońynda baılanys pen aqparat salasyndaǵy neseler portfeli 128 mlrd teńgeni qamtyp, bir jylǵy deńgeıden 78,1 paıyzǵa joǵary boldy. Osyǵan deıin eki jyl qatarynan sektordaǵy nesıe kólemi tómendegen edi.