Qazaqstanda mobıldi aýdarym erejeleri ózgerdi
ASTANA. KAZINFORM — Qarjy naryǵyn retteý jáne damytý agenttigi aqparattyq qaýipsizdik talaptaryn kúsheıtýge baǵyttalǵan jańa normatıvtik túzetýler qabyldady.
Qaýly qarjy uıymdarynda aqparattyq qaýipsizdikti qamtamasyz etý men tsıfrlyq táýekelderdi tómendetýge baǵyttalǵan.
— Qujattyń negizgi maqsaty — qarjy uıymdarynyń aqparattyq qaýipsizdigin qamtamasyz etý talaptaryn kúsheıtý, klıentterdiń derbes derekterin qorǵaý deńgeıin arttyrý jáne kıberqaýipterge jedel den qoıý júıesin jetildirý, — delingen qujatta.
Qaýly normalarynyń bir bóligi alǵashqy resmı jarııalanǵan kúninen keıin 10 kún ótken soń kúshine enedi. Atap aıtqanda, qarjy uıymdarynyń aqparattyq qaýipsizdik jedel ortalyqtary «Qainar» aqparattyq qaýipsizdik oqıǵalary men oqys oqıǵalary týraly aqparatty óńdeýdiń avtomattandyrylǵan júıesin paıdalaný tártibi naqtylanady. Sondaı-aq qoldanystaǵy zańnamaǵa sáıkestendirýge baǵyttalǵan redaktsııalyq túzetýler engizilgen.
Qosymsha uıymdastyrýshylyq jáne tehnıkalyq daıyndyqty qajet etetin normalar 2025 jylǵy 1 qarashadan bastap qoldanysqa engiziledi.
Olardyń ishinde mynadaı negizgi ózgerister bar:
— bank mobıldi qosymshasynda buryn tirkelmegen qurylǵy arqyly klıentti qaıta aýtentıfıkatsııalaý tártibi naqtylanady;
— mıkrofon qosylǵan kezde mobıldi bankıngti buǵattaý talaby engiziledi;
— aqparattyq qaýipsizdikke qaýip tóndirýi múmkin tehnologııalyq oqıǵalar tizbesi keńeıtiledi;
— bank ınfraqurylymy isten shyqqan jaǵdaıda ýákiletti organdy «Qainar» júıesine balama retinde telefon arqyly habarlaý múmkindigi engiziledi;
— táýekelderdi basqarý júıesine sáıkes, bank bólimshelerindegi aqparattyq qaýipsizdik pen alaıaqtyqqa qarsy kúres fýnktsııalary bólinedi;
— bankterdiń aqparattyq qaýipsizdik júıesine syrtqy tekserý keminde úsh jylda bir ret júrgiziledi.
— Jańa talaptar qarjy uıymdarynyń tsıfrlyq turaqtylyǵyn arttyryp, aqparattyq qaýipsizdik mádenıetin qalyptastyrýǵa serpin beredi, — delingen Agenttik habarlamasynda.
Buǵan deıin bankter nesıe aldyrtý úshin halyqqa telefon shalýdy doǵarmaı jatqanyn jazǵanbyz.
Eske salsaq, búgin Májilis bank qyzmeti týraly zań jobasyn maquldady.