Bank kartasyn tonaıtyndardyń tuzaǵyna túsip qalýdan qalaı saqtaný kerek
Internet alaıaqtary kóbinese ataqty ınternet dúkenderdiń kóshirme saıtynda (fıshıng) júredi. Fıshıng saıttarǵa kirgen adamdar óz kartalarynyń rekvızıtterin qaldyrady. Karta rekvızıti arqyly ınternet alaıaqtar sanaýly sekýndtarda shotyńyzdy bos qaldyrýy múmkin.
«Fıshıng saıttardyń tuzaǵyna túsip qalmaý úshin tutynýshy ınternetti qoldaný, qorǵaý sharalary týraly az da bolsyn aqparat bilýi kerek. Internet dúken saıtynyń adresi https:// dep emes, https:// dep bastalýy kerek. Eger saıtta sizdiń jeke maǵlumattaryńyzdy, tólem kartasynyń CVV-kodyn surasa (kartanyń arǵy betindegi 3 tańbaly san) osy ýaqyttan-aq saıtty jaýyp shyǵyp ketý kerek», - dedi habarlamada.
Kıberalaıaqtardyń quryǵyna túsip qalmaýdyń birneshe qarapaıym tásili bar. Esh jerde jeke maǵlumatty kórsetpeý, saıttyń bezendirilýine mán berý, adres jolaǵynda siltemeniń durystyǵyn tekserý, https jelisin baqylaý, kúdikti hattardy fıltrleý, bank akkaýnttaryna kirý úshin ashyq wi-fi qoldanbaý, jeke maǵlumatty eshkimge jarııa etpeý kerek.
Sonymen qatar, alaıaqtar klıentterge bank qyzmetkeri sııaqty habarlasyp, tólem kartasynda aqaý shyqqanyn, tez arada buǵatqa túsirý kerek ekenin aıtady.
Sóıtip karta ıesinen kartanyń nómirin, rekvızıtterin bilip alady. Sosyn uıaly telefonyna kod kelgen jaǵdaıda aıtyp berýin ótinedi.
Kodty alǵan soń olar ınternet bankıngtegi nómirdi aýystyryp, shottaǵy aqshany alyp ketedi.
«Bul jaǵdaıda birden áńgimeni toqtatyp, banktiń jeli ortalyǵyna habarlasý kerek. Eger bankten eshkim habarlaspaǵany anyqtalsa, tez arada bank bólimshesine baryp aryzdaný kerek. Bank qyzmetkerleriniń eshqashan birinshi bolyp karta týraly aqparat suraýǵa quqyǵy joq. Eger alaıaq siz týraly kóp maǵlumat biletin bolsa, sizdiń atyńyzdan tovar alyp, jańa shottar ashyp, nesıe alýy da múmkin», - dedi departament qyzmetkerleri.
