Bank kartasyn rásimdeýge qoıylatyn talap kúsheıedi
ASTANA. KAZINFORM – Endi klıentterge karta beretin bankterge birneshe talap qoıylady. Qarjy naryǵyn retteý jáne damytý agenttiginiń buıryǵy «Ashyq NQA» portalynda jarııalandy.
Jańa joba qarjy naryǵynda quqyqqa qarsy is-qımyldardy jáne dropperlikti (esirtkiniń zańsyz aınalymy, qarjy pıramıdalarynyń, onlaın/ınternet-kazınolardyń qyzmetin uıymdastyrý) barynsha azaıtý úshin ázirlendi.
Qujatta klıentterge qashyqtan qyzmet kórsetý jáne dropperlik shemalarǵa tartý táýekelderine ushyraǵan klıentterge qatysty monıtorıngti kúsheıtý, komplaens-baqylaý basshylarynyń jaýapkershiligin kúsheıtý jáne bankterdiń quqyqqa qarsy is-qımyl táýekelderin basqarý jónindegi antıfrod-qyzmetteriniń fýnktsıonalyn keńeıtý bóliginde bankterge qoıylatyn talaptar bar.
Bankterge qandaı talaptar qoıylady ?
- táýekeli joǵary beırezıdent klıentterge qatysty baqylaýdy, onyń ishinde qashyqtan nemese ókil arqyly iskerlik qatynastar ornatýǵa, kartalardy shyǵarýǵa jáne qaıta shyǵarýǵa tyıym salý;
- tólqujattyń fotosýreti boıynsha bıometrııany qoldana otyryp, birizdilik engizý;
- «bir qolda bir tólem kartochkasynyń bolý» ólshemshartyn baqylaý;
- el aýmaǵynda bolý zańdylyǵyn tekserý;
- kartany shyǵarǵan jáne qaıta shyǵarǵan sátten bastap alǵashqy 3 aıda kiris jáne shyǵys tranzaktsııalaryna kúsheıtilgen monıtorıng júrgizý bóliginde baqylaýdy kúsheıtý;
- dropperlik operatsııalardy anyqtaý jáne buǵattaý jáne tólem kartasyn baqylaýsyz shyǵarýdy boldyrmaý maqsatynda bankterdiń Ulttyq banktiń Antıfrod-ortalyǵymen ózara is-qımylyn keńeıtý.
- Joba qarjy naryǵynda quqyqqa qarsy is-qımyldar men dropperlikke (esirtkiniń zańsyz aınalymy, qarjy pıramıdalarynyń qyzmetin uıymdastyrý, onlaın/ınternet-kazıno) jol bermeý/barynsha azaıtý boıynsha qosymsha baqylaý sharalaryn engizýge baǵyttalǵan, - delingen qujat mátininde.
Qujat jobasy bıyl 14 sáýirge deıin qoǵamdyq talqylaýǵa usynylyp otyr.
Jyl basynda Qarjy naryǵyn retteý jáne damytý agenttiginiń esirtki quraldarynyń jáne tsıfrlyq aktıvterdiń zańsyz aınalymy salasynda bank qyzmetin paıdalaný táýekelderin azaıtý jónindegi sharalardy kúsheıtetini týraly habarlaǵan edik.