Bangkoktaǵy ǵımarat apatyna baılanysty Qytaı kompanııalary tergeýge ilindi
ASTANA. KAZINFORM — Taıland bıligi Bangkok qalasynda jer silkinisinen keıin qulaǵan 33 qabatty Memlekettik aýdıt keńsesine tıesili ǵımaratyna baılanysty 37 kompanııaǵa qatysty aýqymdy tergeý bastady.
Jergilikti Khaosod aqparat portalynyń habarlaýynsha, tergeý aıasynda Qytaımen baılanysy bar eki iri kompanııa — China Railway Number 10 jáne Xin Ke Yuan Steel basty nazarda tur.
Tergeý organdary bul kompanııalardyń kóptegen deldal mekemeler arqyly jumys istegenin anyqtaǵan.
Qurylysqa bolat jetkizgen Xin Ke Yuan kompanııasy jalǵan salyq shot-faktýralaryn paıdalanǵany úshin qylmystyq jaýapkershilikke tartylyp jatyr. 2015–2017 jyldar aralyǵynda 200 mıllıon battan astam somaǵa 7 426 zańsyz shot-faktýra tirkelgen.
Sonymen qatar, China Railway kompanııasy Taıland aýmaǵynda 26 memlekettik jobany júzege asyryp jatyr. Alaıda olardyń keıbiri aıaqtalmaı, tastap ketken. Osyǵan baılanysty memlekettik satyp alý protsesi tekserilip jatyr. Eger zań buzýshylyq anyqtalsa, kompanııa qara tizimge engizilýi múmkin.
Bul is boıynsha tergeý sharalaryna birqatar memlekettik organ jumyldyryldy. Saýda mınıstrligine qarasty Kásipkerlikti damytý departamenti baılanysty kompanııalardy zertteýge kiristi. Qarjylyq baqylaý agenttikteri aqshalaı operatsııalardy, Salyq basqarmasy salyq tólemderin tekserip jatyr. Ónerkásiptik standarttar ınstıtýty qurylys materıaldarynyń sapasyn zertteıdi. Sonymen birge, Jer departamenti men Sheteldik bıznes týraly zańdy qadaǵalaıtyn mekemeler de jer men aktsııalar ıeligin zertteýge kiristi.
Sheteldik bıznes týraly zańǵa sáıkes, shetel azamattarynyń atynan úles ıelengen taı azamattaryna jáne ruqsatsyz kásip júrgizgen sheteldikterge 3 jylǵa deıin bas bostandyǵynan aıyrý nemese 100 myńnan 1 mıllıon batqa deıin aıyppul salý qarastyrylǵan.
Tergeý jalǵasýda. Aldyn ala málimetterge súıensek, nomınaldy menshik arqyly zań buzǵan kompanııalar sany budan da kóp bolýy múmkin.
Aıta keteıik, jer silkinisinen keıin tórt qytaı azamatynyń qıraǵan ǵımarat mańyndaǵy konteınerden 32 qujatty alyp ketpek bolǵany anyqtaldy. Taıland polıtsııasynyń habarlaýynsha, bul qujattarda bas merdiger men qosalqy merdigerler týraly egjeı-tegjeıli aqparat bolǵan. Oqıǵa ornynda ustalǵan Qytaı azamattary saqtandyrý ótemaqysyna qujat daıyndaý úshin olardy almaq bolǵanyn túsindirgen. Qujattar tárkilenip, túsinikteme alynǵannan keıin olar bosatyldy.