Banan, mango, avokado: Túrkistandyq sharýalar ekzotıkalyq jemisterdi ósirýdi qolǵa ala bastady
Túrkistandyq sharýalar tropıkalyq jemisterdi ósirýdi qolǵa ala bastady, dep habarlaıjy QazAqparat tilshisi.
Elimizdegi mol kólemde banan óndiretin alǵashqy kásiporyn Saıram aýdanynda ornalasqan. Munda túrkııalyq «Gen group Qazaqstan» kompanııasy 5,3 ga jerge jylyjaı keshenin salyp, banan otyrǵyzǵan. Ósiriletin banan sorty arnaıy Qazaqstannyń klımattyq jaǵdaılaryna beıimdelgen. Alǵashqy ónimdi 6 aıdan keıin jınaý josparlanyp otyr.
Kásiporyn basshysy Tımýr Ýteshov aldaǵy ýaqytta mango, avokado syndy jemis túrlerin óndirýdi josparlap otyrǵandyǵyn jetkizdi.
«Avokado jemisiniń salmaǵy 2 kelige jetedi. Onyń boıyndaǵy qorektik zattardyń kóptigine baılanysty adam densaýlyǵy úshin óte paıdaly. Dıetologtar bul ónimdi júrek-qantamyr, asqazan-ishek aýrýlarymen aýyratyn adamdarǵa jeýdi usynady. Avokado aǵzany tolyǵymen tazalaıtyn qasıetke ıe. Al, mango kalııge baı, sonyń arqasynda júrek pen qan tamyrlary úshin paıdaly. Sonymen qatar, mango aýrýdan aıyqtyra alatyn qasıetke ıe, bas aýrýyn da jaza alady, qaterli isiktiń aldyn alý úshin de tutynylady» - deıdi kásipker.
Ekzotıkalyq jemisterden basqa, jylyjaıda qyzanaq pen qulpynaı ósiriledi. Jobanyń birinshi kezeńdegi quny 4 mln AQSh dollaryn quraıdy. Qurylys sapasy joǵary jylyjaılar klımattyq baqylaý men beıimdelgish qorektendirý júıesimen jabdyqtalǵan.
Qazaqstanda balamasy joq kásiporyn Qaınarbulaq aýyldyq okrýginde ornalasqan. Kásipker jaqyn arada jylyjaı jerin 5 gektarǵa keńeıtpek. Sonda shamamen jylyna 1000 tonna banan óndirýge múmkindik týady.
