Balqashta taǵy bir ádebı aıaldama paıda boldy

BALQASh. QazAqparat - Balqashta aıaldamalardy qazaq halqynyń myqty tulǵalarynyń sýretimen bezendirý jalǵasýda. Búgin «Rýhanı jańǵyrý» baǵdarlamasynyń qurylǵan kúni №1 orta mekteptiń janynda taǵy bir ádebı aıaldama paıda boldy. Ony qala pedagogtary bezendirdi, dep habarlaıdy QazAqparat tilshisi.

Ádebı aıaldama materıaldary Qaraǵandy oblysynyń Aqtoǵaı aýdanynyń týmalary - Álıhan Bókeıhanov, Jaqyp Aqbaev jáne Álimhan Ermekov týraly baıandaıdy. Balqashtyqtar QR kod arqyly olardyń ómirbaıanymen jáne eń tanymal eńbekterimen tanysa alady.

Esterińizge sala keteıik, ótken jyly Balqashta eki ádebı aıaldama paıda bolǵan edi. Pavılondardyń biri Abaıdyń 175 jyldyǵyna arnalǵan. Onyń ishki jaǵynda uly aqyn men oıshyldyń beınesin, onyń ómir súrgen jyldary týraly málimetterdi, sondaı-aq «Tolyq adam» fılosofııalyq formýlasynyń negizgi qaǵıdalarynan qazaq jáne orys tilderindegi úzindilerdi kórýge bolady. Aıaldamanyń syrtqy jaǵynda Balqashtyń logotıpi men ánurany ornalasqan.

Ekinshi pavılon Ál-Farabıdiń qurmetine bezendirilgen. Ol Abaıǵa arnalǵan aıaldamaǵa qarama-qarsy ornalasqan, onda da fotosýretter, qysqasha ómirbaıan málimeti, ǵalym men fılosoftyń eńbekterinen úzindiler bar.

Bul jumysty mádenıet qyzmetkerleri jeke kásipker Baqtııar Myrzabaevtyń demeýshiligimen Qazaqstan Táýelsizdiginiń 30 jyldyǵyn merekeleýge daıyndyq aıasynda uıymdastyrdy.

Qaladaǵy avtobýs aıaldamalaryn bezendirý jumystary odan ári jalǵasatyn bolady.