Balqashta balalarǵa arnalǵan jańa ońaltý ortalyǵy ashylady

BALQASh. QazAqparat – Balqashta oblystyń túkpir-túkpirinen kelgen múmkindigi shekteýli balalarǵa ońaltý kómegi kórsetiletin bolady. Qalada qańtar aıynda memlekettik mamandandyrylǵan ortalyq iske qosylady. Ol bir jarym jastan 18 jasqa deıingi balalar men jasóspirimderdi qabyldaıdy, dep habarlaıdy QazAqparat tilshisi.

Jańa ońaltý ortalyǵynda Qaraǵandy oblysynyń ákimi Ermaǵanbet Bólekpaev bolyp, onyń jaıymen tanysty.

Ońaltý ortalyǵyn ornalastyrý úshin 1972 jyly salynǵan ǵımarat qaıta quryldy. Injenerlik kommýnıkatsııalar tolyǵymen jańartyldy, úı-jaılarda qol jetimdi orta qaǵıdaty boıynsha jóndeý júrgizildi. Baspaldaqtarǵa arnaıy kótergishter ornatyldy.

Ortalyqqa jumys isteý úshin dárigerler men pedagogtar: pedıatr, travmatolog-ortoped, reabılıtolog, psıholog, nevropatolog, logoped, defektolog, mýzyka jáne dene shynyqtyrý muǵalimderi jáne basqa da mamandar qabyldandy. Jattyǵý terapııasy, fızıoterapııa, massaj bólmeleri jabdyqtalǵan. Montessorı bólmesi jabdyqtalǵan ystyq vanna men trenajerler, galvanızatsııa jáne elektroforez, magnıtoterapııa jáne t.b. apparattar bar.

Jatyn bólmelerde fýnktsıonaldy kereýetter qoıyldy. Patsıentterge kúnine bes ret ystyq tamaq beriledi.

Ortalyq 50 orynǵa eseptelgen. Kórsetkishter boıynsha balalar alty aıǵa deıin osynda em ala alady. Ońaltý keshendi túrde júrgiziledi: medıtsınalyq, áleýmettik jáne pedagogıkalyq ońaltý. Barlyq qyzmetter tegin. Qabyldaý Aleumet.egov áleýmettik qyzmetter portaly arqyly júzege asyrylady.

Naýqastardyń alǵashqy legi 18 qańtarda qabyldanady dep kútilýde.