Balqashta 30-ǵa jýyq úı jylýdan ajyratyldy

Balqashta keshe jylý magıstraldarynda eki apat boldy. Saldarynan 28 úı jylýsyz qaldy. Qazir qala bıligi men kommýnaldyq qyzmetter aqaýdy joıyp jatyr, dep habarlaıdy Kazinform.

Birinshi apat keshe tústen keıin Muhamedjanov kóshesindegi № 32 úıdiń janynda boldy. 426 mm dıametrli magıstraldyń burylysynda ystyq sý aǵyp ketip, keri qubyrdaǵy qysym tómendedi. Saldarynan Muhamedjanov shaǵynaýdany jylýsyz qaldy.

Ekinshi apat týraly Balqash qalasynyń ákimdigi túnde habarlady.

«9 jeltoqsan, saǵat 22: 55-te Abaı jáne Ábýǵalıev kósheleriniń qıylysynda dıametri 630 mm qubyrdyń jarylýynan kelesi mekenjaılar boıynsha jylý parametrleri tómendedi:

Jeltoqsan 11,12,13,14,15;

Álem 1,2,3,4,5,6,7,8,9,10,11,12,

Seıfýllın 28,34,36,36 a, 32,30,32 a, 35, 31, 41, 45;

Abaı 56,44,46,48,50,52,47,49,53,51,55,

Makarenko 1,3

Moldaǵulova 1,2,3,4

Apattyń oryn alýyna qalanyń jylý jelileriniń tozýy sebep boldy, tozý 75% quraıdy. Dalada aýa temperatýra -15°S. Anyqtalǵan faktilerdi joıý maqsatynda barlyq KMK, PIK, TJ, qala ákimshiliginiń qatysýymen jedel shtab quryldy», — dep habarlady Balqash qalasynyń ákimdiginde.

Jóndeý jáne qalpyna keltirý jumystaryn «Balqash jylý» JShS júrgizip jatyr. Apat ornyna 10 qyzmetker men 5 tehnıka jumyldyryldy.

«Sýdyń aǵyp ketýine klapan tyǵyzdaǵyshynyń sý jiberýi sebep boldy. Qazirgi ýaqytta qubyr aýystyryldy, aǵý toqtatyldy, shema jınalyp jatyr, keıni jylý berý iske qosylady», — dep tolyqtyrdy Balqash ákimdiginen.

Qazirgi ýaqytta apat ornynda qala basshysy Sapar Sataev júr. Balqash basshylyǵy qalǵan 10 úıge birneshe saǵat ishinde jylý jiberiledi dep ýáde berdi.

Aıta keteıik, apat saldarynan Aqtaý qalasynyń turǵyndary da jylýsyz otyr. 

Al Atyraýda Jaıyq ózeniniń qatyp qalýynan halyqqa sý berý toqtatyldy.