Balqash qalasynda jańa úıler salynyp, ınfraqurylym jańartylady
Oblys ákiminiń aralaýy Qońyrat kentinen bastaldy. Jeńis Qasymbekke eldi mekendegi qazandyqtyń jaı-kúıi týraly aqparat berdi. Ol 1968 jyly salynǵan. Buryn «Qazaqmys» vedomstvosynyń birliginde bolǵan, 2013 jyly nysan qalanyń qaraýyna tapsyryldy. Qazir jabdyqtar men qazandyqtardyń 85% tozǵan.
«Problemalardy sheshý úshin biz jobalyq-smetalyq qujattamany ázirledik, qazir qarjylandyrý máselesi sheshilýde. Qurylys-montaj jumystarynyń jalpy quny 5.3 mlrd teńgeni quraıdy, jobany iske asyrý merzimi 10 aı»,-dedi Balqash qalasynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi basshysynyń mindetin atqarýshy Aırat Qaramurzın.
Qazandyqty qaıta qurý jobasy «Nurly jer» baǵdarlamasy boıynsha júzege asyrylady. Jeńis Qasymbektiń aıtýynsha, eki jyl ishinde bul másele sheshilýi tıis.
Sondaı-aq, oblys basshysy Balqash JEO-da boldy. Bul eski nysandardyń biri - 1938 jyly salynǵan. Stansa jylytý maýsymyna daıyndyq tólqujatyn aldy. Qýaty 460 Gkal. Jylý kestege sáıkes beriledi.
Balqashtyqtardy jylýmen qamtamasyz etýden bólek, Jeńis Qasymbekti úı salý máselesi de qyzyqtyrdy. Búgingi tańda Balqash qalasynda turǵyn úı kezeginde 1 300 adam turǵanyn jáne qonys toıyn TQJB-nyń 5 000 salymshysy kútip turǵanyn eskere otyryp, qurylys qarqyny nazardan tys qalǵan joq. Oblys ákimi sońǵy jyldary 10 úı salynǵan Samal shaǵyn aýdanynda bolyp qaıtty. Munda taǵy bir 45 páterli kópqabatty úı turǵyzyla bastady. Bul jalǵa beriletin turǵyn úı bolady. 2020 jyly taǵy úsh úıdi paıdalanýǵa berý josparlanyp otyr.
Sondaı-aq, aımaq basshysy «Baldáýren» respýblıkalyq oqý-saýyqtyrý ortalyǵynyń fılıalyna bardy. Balqashtaǵy balalar demalys orny osy jazda ashyldy jáne onda osyǵan deıin 2000-ǵa jýyq balalar demalyp úlgergen.
«Negizinen elimizdiń soltústik oblystarynan - Aqmola, Pavlodar oblystarynan, Petropavldan, sondaı-aq ShQO-nan balalar keledi. Bizde vannanyń birneshe túri, balshyq, basseın jáne ottegi kokteılderi bar. Biz 30-dan astam emdeý túrlerin usynamyz. Jazda ortalyqta kól sýy paıdalanylady, al qysqy ýaqytta balalar basseınge barady. Ótken maýsymda biz 2 080 shara ótkizdik», - dedi ortalyq dırektorynyń orynbasary Gúlaıman Qojaeva.
Ortalyqtyń jalǵyz problemasy – oǵan aparatyn jol. Mekemeniń dırektory óńir basshysynan osy máselege qatysty kómek surady.
«Iá, joldarǵa qatysty másele ózekti. Biz olardy kelesi jyly sheshýge tyrysamyz», - dep jaýap berdi Jeńis Qasymbek.
Saýyqtyrý ortalyǵynyń korpýsy buryn «Qazaqmys» korporatsııasyna tıesili bolǵan. Onda metallýrgter shıpajaıy ornalasqan. Depýtattar men qoǵam belsendileriniń suranystary boıynsha keıin korporatsııa ǵımaratty Bilim jáne ǵylym mınıstrligine óteýsiz paıdalanýǵa berdi.
Qalalyq aktıv otyrysynda Balqash qalasynyń basqa da ózekti máseleleri talqylandy. Áńgime ınfraqurylym, sýmen jáne jylýmen qamtamasyz etý, ekologııa, azyq-túlik baǵasy jáne abattandyrý máseleleri tóireginde órbidi.
Oblys ákimi barlyq suraqtar boıynsha sheshim qabyldaýdy tapsyrdy.
«Qońyrat shaǵyn aýdanynda úzdiksiz jylý berýdi qamtamasyz etý qajet. Ol úshin biz respýblıka tarapynan kómek suraımyz. Qazandyq jóndelip, jylýmen qamtý máselesin eki jyl aralyǵynda sheshemiz. Sondaı-aq Saıaq kentin sýmen qamtamasyz etý basym joba bolyp tabylady. Balqash qalasynyń sý qubyry jelilerin jóndeý qajet. Bul máseleni sheshý kerek, JSQ daıyndańyz. Ekologııa máselelerin de sheshetin bolamyz, QTQ úshin polıgon salý kerek. Eń bastysy - qalanyń syrtqy kelbeti. Turǵyn úı qatynastary boıynsha jańa zań qańtardan bastap kúshine enedi jáne alǵashqy ret ákimdikterge lıftiler men qasbetterdi jóndeý máselelerin sheshýge múmkindik beredi. Qalany damytý, oǵan týrısterdi tartý kerek. Osy suraqtarmen aınalysyńyzdar, olardy keıinge qaldyrmańyzdar», - dedi Jeńis Qasymbek.
